Opening sa Cordova caging malampuson

CEBU, Philippines - Mapasigarbubon kaayo si Cordova councilor  Roque Yburan sa malampusong pagbukas sa ilang CESAFI Inter-Collegiate ug ang Commercial Open tournaments didto sa Cordova Sports Complex.

Kini tungod sa maayong pagpadagan sa maong torneyo ilabi na sa bag-o lang gisugdan nga Cordova Inter-Barangay tournament nga gisalmotan og labing menos 40 ka teams sa tulo ka managlahing age divisions.

Matud pa sa konsehal nga natuman ang iyang damgo ug pangandoy nga mopasiugda og dakung torneyo sa Cordova nga gihangop sab sa mahiligon kaayo sa basketbol tungod kay ilang nasaksihan sa linawas nga nagduwa sa ilang nataran ang mga top collegiate players ug ang kanhi nilang mga idolo nga nagduwa sa commercial teams.

Misamot ang kalipay ni Yburan tungod kay si Bogo City Mayor Celestino E. Martinez Jr. misaksi sa opening games.

Sa iyang bahin, si Basketballl Association of Cordova (BAC) commissioner  Boy Allan Lataza nagkanayon nga hapsay kaayo ang maong opening.

Sa unang duwa sa CESAFI Pre-Season,  ang Cebu Institute of Technology-University (CIT-U) Wildcats midaog batok sa University of Cebu (UC) Webmasters sa iskor nga 91-67. Samtang sa Commercial-Open, ang SG

Julie's Bakeshop  midaog batok sa ASPA sa iskor nga 79-70 diin nagpakita gihapon sa iyang kahait si Stephen Padilla, kinsa mihimo'g lima ka three-pointers sa maong duwa.