Orange nakaipsot sa black
CEBU, Philippines - Nakaipsot ang team Orange sa kulbahinam nga duwa batok sa Black team, 79-76 sa Sunday Club 8th Founding Anniversary League basketball tournament niadtong Domingo didto sa San Roque Parish gym sa barangay Subangdaku, dakbayan sa Mandaue.
Sila si Glen 'Dodod' Colina ug Ohing Ortiz maoy hagdanan sa kadaugan sa Orange team pinaagi sa ilang sunod-sunod nga opensa sa daginutong oras sa duwa.
Sila si Colina ug Ortiz parehong miiskor og 14 puntos ug may tagduha ka three-pointers.
Gilubong og katunga ang Orange team paghuman sa unang 10 minutos sa duwa, 12-24, apan gihinay-hinayan kini nila'g kitkit hangtod nga nakatabla, 34-all human sa basket ni Colina sa nahabiling 1:15 sa dili pa ang halftime.Hinuon, nakarekober ang Black pinaagi sa mga paningkamot nilang Cito Enriquez, Onyot Sasing, Teddy Mejares ug Larry Lauron aron moabante pag-usab, 76-74 sa katapusang 1:40 sa final period.
Nailog sa Orange ang momentum, 77-76 sa nahabiling 24 segundos sa three-pointer ni Ortiz ug nainat pa kini ngadto sa tres puntos kortesiya sa free throws ni Colina nga maoy miselyo sa kadaugan.
May higayon unta ang Black team nga mahatod ang duwa ngadto sa overtime, apan mikagar ang three-point attempt ni Sasing.
Si Ritchie Tecson miambit og 13 puntos, lakip na ang iyang usa ka triple nga nakatabla sa duwa, 70-all. Si Gideon Ipili mihimo sab og double figures pinaagi sa iyang 12 puntos. Gamit sab kaayo si Jhonny Labares sa rebounding department kay gawas sa iyang otso puntos, milangkat sab siya og 11 ka rebounds.
Si Sasing mirehistro og 20 puntos aron maoy mangulo sa Black team, gisundan ni Mejares nga adunay 10 puntos.
Puntos matag usa
ORANGE (79) – Colina 14, Ortiz 14, Tecson 13, Ipili 12, Labares 8, Pizzaras 6, Perolino 5, Gonzaga 4, Aventajado 3.
BLACK (76) – Sasing 20, Mejares 10, Enriquez 8, Lauron 8, Benson 7, Chin 6, Dumanon 6, Narte 4, Coyme 3, Cabcaban 2, Ybañez 2. (BANAT NEWS)
- Latest
