Ecu Line abante, Global ug Ynah buhi pa

CEBU, Philippines - Miabante na ang Ecu Line ngadto sa quarterfinals human sa ilang 99-79 nga kadaugan batok sa Alin Brokers samtang nakapugos og knockout games ang JVD Brokers ug ang Ynah Brokers human sila modaug batok sa tagsa-tagsa nila ka kaatbang kaniadtong Martes sa gabii sa nagpadayon nga 2nd BOC-CIPU basketball tournament didto sa barangay Tinago gym, ning dakbayan.

Naka-ipsot ang JVD batok sa Global, 97-95  samtang na-upset sa Ynah ang Avenido Brokers, 103-99 aron makapugos og knockout karong gabii diin ang modaug maoy moabante ngadto sa quarterfinals.

Parehong naghupot og twice-to-beat advantage ang Global ug ang Avenido busa gihatagan pa sila'g laing higayon nga makabawos sa ilang mga kontra karong gabii.

Matod pa ni Erwin Diaz, ang team captain sa Global nga ilang paningkamotan nga makuha nila ang luna sa quarterfinals aron dili sab mausik ang ilang kahago atol sa elimination round ug dili maanugon ang suporta ni Global team owner Carmel de Pio Salvador.

Nagkanayon si Diaz nga mas pabor sila sa tapad ug mas kasaligan ang ilang starting five busa dili siya angay mabalaka sa ilang knockout match.

Sa laing bahin, gipakuratan sab sa Ynah ang Avenido pinaagi sa 32 puntos ni Tata Laborte apan ang 16 puntos nga kontribusyon ni Jef Garcia a.k.a. "Allen Iverson" sa BOC-CIPU, maoy rason nganong ilang napukan ang Avenido tungod sab sa ilang epektibong running game hinungdan nga daghan silang nahimong fastbreak points.

Matod pa ni Garcia nga daku'g purohan nga ilang tagakon ang Avenido kung ilang mamentenar ang mao gihapong matang sa duwa karong gabii diin balanse kaayo ang ilang opensa.

Puntos matag usa:

First Game:

JVD (97) — Ybanez 28, Villarin 21, Sanguenza 15, Villarin 14, Cabrera 4, Gerundio 2, Nadal 2.

Global (95) —  Plando 21, Jadraque 17, Cedeno 13, Dinolang 11, Manulat 10, Baguio 10, Banghal 7,  Engracial 2, Castro 2, Diaz 1, Caynila 1.

Second Game:

Ynah (103) —  Laborte 32, Garcia 16, Allerite 11, Purcia 11, Oporto 11, Peras 6, Carmen 4, Lobitana  3, Piape 3, Niones 2.

Avenido (99) — Villa 21, Dungog 21, Arevalo 16, Jordan 12, Quilantang 8, Mompar 5, Merino 4, Avenido 3, Pangan 3, Nudalo 2, Inhambre 2, Sumambong 2.  (BANAT PALARO)