Farenas away IBF eliminator

CEBU, Philippines - Ang Filipino  super featherweight contender nga si Michael 'Hammer Fist' Farenas (38-4, 30KOs) makigsangka ni Mark Davis (18-0, 5KOs) sa usa ka IBF eliminator sa Hulyo 2  didto sa Foxwoods Resort sa Connecticut.

 Ang modaog sa Farenas-Davis showdown mahimong mandatory challenger alang sa IBF 130-pound title nga kasamtangang gihuptan ni Argenis Mendez sa Dominican Republic.

 Si Mendez manalipod sab sa iyang bakus sa Hulyo 10 batok ni Rances Barthelemy.

 Ubos sa giya ni Filipino coach Carl Peñalosa, si Farenas, kinsa nangandoy nga mahimong world champion padayong mipaubos og subsob nga ensayo alang sa maong sangka.

 Ang 27-anyos nga si Farenas maoy fighter ni former two-division Filipino world champion Gerry Peñalosa, kinsa nagsilbe sab  nga manedyer.

 Ang garbo sa Gubat, Sorsogon nagsubay karon sa four-fight knockout winning streak, ang katapusan mao ang iyang second round TKO batok ni Mexican veteran Hector Velasquez. Si Velasquez nakatilaw na sa mga kumo ni Manny Pacquiao niadtong Marso 21 didto sa San Juan Arena.

 Sa iyang bahin, si Davis kinsa gilantaw nga usa sa mga rising super featherweight sa Estados Unidos magsalig sa iyang kapaspas. (BANAT NEWS)