UV, USC midaog titulo sa CYBL Vismin Goodwill games
CEBU, Philippines - Ang University of the Visayas (UV) ug University of San Carlos (USC) misakmit og kampiyonato sa tagsa-tagsa nila ka dibisyon sa CYBL VisMin Goodwill Games nga gipaluyohan sa Alaska sa miaging adlaw didto sa Magis Eagles Arena sa Sacred Heart School-Ateneo de Cebu sa Canduman campus, Mandaue City.
Midaog ang UV batok sa SHS-Ateneo, 50-48 aron sakmiton ang Under-15 division title, samtang ang USC milubong sa UV, 54-36 aron langkaton ang Under-12 division class.
Naglabaw ang UV og tres puntos sa first quarter, 13-10 ug miburot kini ngadto sa 29-22 sa halftime. Apan mihiyos kini ngadto sa dos puntos 38-36 paingon sa final period. Sa katapusang kuwarter, nagsinukliay og puntos silang Denzel Sabroso sa UV ug John Chen sa SHS-AdC.
Miburot ang labaw sa UV, 46-40 sa three-point shot ni Sabroso sa nahabiling 6:43 sa duwa. Mibawos si Chen og tres aron makan-an ang labaw ngadto sa tres puntos, 46-43. Miposa og laing triple si Sabroso aron hatagan ang ang UV og 49-43 nga bentaha sa katapusang 2:54 sa duwa. Napahakan na sab ang labaw sa UV human sa basket ni Chen, 49-45 sa wala pa ang split charities ni James Zenarosa alang sa 50-45 nga labaw sa nahabiling 1:45.
Si Sabroso kinsa bag-o lang mibalhin sa UV gikan sa Cebu Eastern College, maoy nangu sa UV sa iyang 12 puntos samtang si Chen mao sab ang nangu sa SHS sa iyang 14 puntos.
Sa Under 12 division, gidominar sa USC ang duwa ug wala nila hatagi'g higayon nga molabaw ang UV.
Gitapos sa USC ang first quarter sa iskor, 13-2 ug nainat pa kini ngadto sa 14 puntos sa halftime, 24-10.
Mitubo pag-ayo ang labaw sa USC didto sa third period sa 19 puntos, 39-20 sa wala pa ang ilang 18 puntos nga kadaugan.
Si Brandon Largo maoy topscorer sa USC sa iyang 13 puntos, samtang silang Tracy Dadang ug Justin Atilano parehong may 10 puntos. (BANAT PALARO)
- Latest
