Mayor Rama chessfest sugdan karong adlawa

CEBU, Philippines -   Manalipod na sa ilang balwarte ang mga dekalibreng chess players dinhi sa Sugbu batok sa mga lig-ong "out-of-town" entries dihang ang Mayor Mike Rama Chess Open Active Tournament mosikad karong adlawa diha sa The Event Centre sa SM City-Cebu.

 Pangulohan kini nilang International Masters Bario Nadera ug Kim Yap. Gawas nilang Nadera ug Yap, ang lain pang mga banggiitang Sugbuanon nga mopakita'g aksiyon naglakip nilang FIDE Master Anthony Makinano, NMs Merben Roque, Rogelio Enriquez, Arnold Cadiz ug Leonardo Alidani ug ingon man Rommel Ganzon, Edcel Montoya, Eden Diano, Richard Natividad, Carlos Moreno III ug Macau-bound Rhenzi Kyle Sevillano.

 Kapin sa 100 ka chess players ang mosalmot ning tulo ka adlaw nga kompetisyon nga gipasiugdahan sa lokal nga kagamhanan sa siyudad sa Sugbu pinaagi sa ilang sports commission uban sa Cebu Executives and Professionals Chess Association (CEPCA).

 Si Jun Olis sa CEPCA miingon nga ang mga pambato sa Sugbu gipaabot nga makasugat og lig-ong kaatbang sama nilang NM Rustum Tolentino sa Cagayan de Oro City, reigning Bohol champion Glicerio Pardillo ug Allan Cantojos sa Gingoog City, Misamis Oriental. (BANAT PALARO)