Adlawan, mangusong nanghawod sa 2nd Leg Ms Motosuit Moto-X Series

CEBU, Philippines - Garbo sa Sugbu nga si  Jon-Jon Adlawan ug star rider sa Davao nga si Bornok Mangusong maoy nangulo sa mga mananaog atol sa second leg sa 2014 MS Motosuit Motocross Series nga giuloha'g 4th Mayor Butch Sepulveda Motocross Challenge  niadtong  Domingo didto sa Brgy. Lugo sa lungsod sa Borbon sa amihanang bahin sa Sugbu.

 Gipakita ni Adlawan ang iyang katakus  atubangan sa iyang katagilungsod aron maghari sa pro open division. Mipatigbabaw siya batok ni Mangusong alang sa labing taas nga dungog, samtang laing Sugbuanong rider nga si  Venil Abellar nalandig sa ikatulo.

 Namawi hinuon si Mangusong sa expert category dihang iyang gilangkat ang titulo. Si Adlawan nalagpot sa ikaduha, samtang si  Abellar nagpabilin sa ikatulong dapit.

 Mikawat sab og salida si Jed Luna sa Mt. Sioan Racing Team dihang iyang giangkon ang titulo sa open enduro class batok nilang Dongkey Sanchez ug JP Cuesta.

 Giharian sab ni Clinton Gualiza ang local enduro dihang iyang gipilde silang John Allein Cobreros, Sanchez, JC Obligado ug  Alex Abalo.

 Midaog sab og laing titulo si Jed Luna pinaagi sa beginners open. Sila si JP Cuesta ug Denmar Supatan miangkon sa ikaduha ug ikatulong dapit. Si Luna ikaduha sab sa novice open  production nga gidominar ni Jougie Basco.

 Sa intermediate division, si  Winsor Pamorca maoy labing paspas, gisundan nilang John Flores ug Jougie Basco.

 Si Dexter Bacabac maoy nangu sa top three finishers sa executive-A uban nilang James Duroy ug Siegfred Ornopia. Ang top three finishers sa  executive B ug C mao sila si Duroy, Ornopia ug Roscel Gungob.

 Ang multi-titled nga si BJ Pepito maoy naghari sa mini class 85cc. Iyang gipilde si Leonardo Angelo alang sa  dungog, samtang sila si  Brylle Ornopia, Gyle Aguilar ug Paul Steven Colizar maoy mikompleto sa top five.

 Gawas ni Brylle, laing duha ka pag-umangkon ni race organizer ug MS Motosuit big boss Lou Ornopia wala sab magpaalkanse sa  tagsa-tagsa nila ka dibisyon. Si Ken Kerry Ornopia maoy giilang prinsipe sa peewee 50cc. human gipilde silang Edwin Chan Dilao ug Renier Cabras, samtang si Keizer Ornopia mipahiluna sa ikaduha ngadto  ni Lloyd Abrenica sa mini class 65cc. Si Kenken Ornopia nalandig sa ikatulo.

 Sa laing bahin, si RK Cuesta maoy nahimong rayna sa ladies category. Si Janica Adlawan mipahiluna sa ikaduha, samtang si Mariel Villafuerte mikapyot sa ikatulo.

 Ang top five sa underbone race mao sila si Gualiza Clinton, Allain Cobreros, JR Gualiza, Wenmar Salde ug Raymund Alivio.

 Gipaluyohan sa local government sa Borbon, ang usa ka adlaw nga kompetisyon nahimong posible pinaagi sa suporta sa Mt. Sioan Racing Team, Dodong Baguiz, Jed Luna ug Gingoog City.