SWU batok DLSU, UV batok UE karong gabii sa Hoops Dome

CEBU, Philippines - Isugal sa Southwestern University (SWU) Cobras ang ilang limpyong 4-0 record sa dihang ilang sangkaon ang higpit nilang karibal gikan sa Manila, ang reigning UAAP champion De La Salle University (DLSU) Green Archers sa FilOil Flying V Hanes Premier Cup didto sa Hoops Dome karong gabii didto sa dakbayan sa Lapu-Lapu.

MGA DUWA KARON

(Hoops Dome)

3:00  pm -- UE vs. UV

5:00 pm -- DLSU vs. SWU

Gawas sa "homecourt advantage," makuha sab sa Cobras ang suporta gikan sa ilang fans aron makabawi sa ilang kapildihan gikan sa mga kamot sa Green Archers, kinsa maoy nagpukan kanila sa 2013 edition sa tinuig nga Philippine Colleagiate Champions League (PCCL) finals didto sa Manila.

Laing gikahinaman nga sangka karong gabii mao ang duwa sa wala pay daog nga Cebu Schools Athletic Foundation Inc. (CESAFI) 10-time champions University of the Visayas (UV) Green Lancers batok sa University of the East (UE) Red Warriors. Nagtinguha ang UV Lancers nga  mokulit sa labing una nilang daog.

Atol sa press conference kagahapon didto sa Sarrosa International Hotel, si La Salle coach Juno Saluer  nagtuo nga mahimong pisikal ang ilang duwa batok sa Cobras karong gabii.

Naglaraw ang SWU nga mobawos ngadto sa La Salle dinhi mismo sa ilang nataran ug mapruyba sab ni point guard Mark Jayven Tallo nga sayop ang La Salle sa pagbuhi kaniya hinungdan napugos siya'g balhin uban sa Cobras.