Cebu abante sa finals sa Coke PBA Nationals

CEBU, Philippines - Milansang sa  ikaupat nilang sunod-sunod nga daog ang team Cebu human   ilang gilubong ang Cagayan de Oro, 49-34 sa national finals sa Coca Cola PBA Youngstars Basketball Tournament didto sa JCSGO Gym sa Cubao, Quezon City.

Tungod niini, nakuha sa Cebu ang unang lingkoranan   alang sa kampiyonato.

Miarangkada dayon ang Cebu pagsugod sa duwa aron moposte'g 20-6 nga bentaha paghuman sa unang 10 minutos duwa, apan  nakan-an  kini,  24-28 . Kini tungod kay gipasulod ni Cebu coach Jay Mar Canoy ang iyang mga reserba nga naghatag sa Cagayan de Oro og higayon   pagpahak sa labaw.

Human sa  halftime, ang Cagayan de Oro  milusad  og mainitong rally ug nahiyos ang labaw ngadto na lang sa dos puntos, 30-32.

Gipasud sa Cebu ang ilang mga sinaligan sa final period aron mapakgang ang dautang laraw sa Cagayan de Oro.

Si Joshua Flores maoy topscorer sa Cebu nga miratsada'g 14 puntos, gisundan ni Orlan Wamar sa iyang 11 puntos ug Jifford Cahigas nga adunay 10 puntos.

Sa laing aksiyon, ang Batangas padayong mikutlo og daog human sab nila gilubong ang KABAKA Manila sa iskor nga 61-43.

Midaog sab ang Pampanga pinaagi sa pagmasaker sa Valenzuela, 54-34.

Wala pa matino kun kinsa ang sangkaon sa Cebu sa finals gumikan kay adunay posibilidad tulo ang mag-tie alang sa ikaduhang dapit.

Kun mahitabo, sulbaron kini pinaagi sa PBA quotient system (points scored/points allowed). Ang simple two-way tie buk-on pinaagi sa winner over the other rule.