Harris gustong mag-coach sa PBA

CEBU, Philippines - Niadtong dekada 90 nagbaniog ang ngan ni Tony Harris sa PBA. Ang kanhi import sa Swift Mighty Meaties misikat og maayo human siya miiskor og 105 puntos sa ilang duwa didto sa IloIlo City batok sa Ginebra San Miguel nga niadtong panahona ubos pa ni coach Robert 'Sonny' Jaworski.

"That made me famous," (mao gyud to'y naka pasikat na ko) matud pa ni Harris nga nahinabi   niining tigsulat didto sa Baton Rouge, Louisiana sa balay sa usa ka Pinoy'ng magtutudlo. Iyang gibutyag nga human siya miiskor og 105 puntos, gitawgan dayon siya sa Boston Celtics aron moduwa sa NBA. "They thought I've done enough in Asia," matud pa ni Harris.

Gisaysay usab ni Harris ang iyang interes nga mopadayon sa iyang nahimo sa mga street children sa Pilipinas. Kun makabisita siya'g usab buot niyang motabang sa mga  street children, dili lang sa kaulohan lakip na usab sa mga probinsiya.

Gipadayag ni Harris nga gusto niyang mahimong coach o maapil sa coaching staff sa usa sa mga PBA teams. "I believe I have a lot to give, and I have a lot to share," sumala pa sa kanhi PBA best import. (daghan ko'g mahatag ug mapaambit sa mga batan-ong player sa Pilipinas).

Sa dihang nagduwa pa siya sa NBA, matud niya, daghang gusto motawag niya og "The Hurricane" pero iya kining tubagon, "Only Filipinos have the right to call me that" (mga Pinoy ray adunay katungod nga motawag nako ana). Iya ko nga gipasabot nga ang angga nga "The Hurricane" nakuha niya sa Pilipinas tungod kay daw bagyo niyang gipangguba ang score records nga napatik sa PBA.

"The Philippines has made me famous and I want to give back to that country, to the street children, and as a coach." (ang Pilipinas naka pasikat nako ug gusto nakong suklian kini, sa pagtabang sa street children ug pagtabang sa mga batan-on pinaagi sa pag coach nila) pasabot ni Harris. Nagplano ang kanhi player sa University of New Orleans nga mobisita sa Pilipinas karong Agosto. (BANAT NEWS)