Surban, Mier naka-medal sa PNG 2014
CEBU, Philippines - Nakuha sa Sugbuanong Niño Surban ug John Rene Mier ang 1-2 finish sa managlahing dibisyon sa mountainbike cross-country event sa 2014 Philippine National Games kagahapon didto sa Tagaytay, Pasig.
Wala unta’y plano si Surban nga mosalmot sa lumba tungod kay mo-concentrate siya sa iyang preparasyon alang sa duha ka mga dagkung lumba didto sa Japan sa mosunod nga duha ka semana ug sa 2014 Asean Mountainbike Cup sa Danao City, Cebu.
Naahat si Surban sa pagsalmot kay ang tanang sakop sa national mountainbike team gikinahanglang mosalmot sa kalihukan aron magpabiling miyembro sa nasudnong koponan.
Sa iyang pagsalmot si Surban midaog og gold human niya gitapos ang lumba sa oras nga 48 minutos ug 51 segundos alang sa bulawan. Si March Aleonar, kinsa mioras og 49.51 mipahiluna sa ikaduha, gisundan ni Alvin Benosa sa oras nga 50:18.
Sa laing bahin, ang trackster nga si Mier, kinsa misuway og lumba sa mountainbike midaog og silver sa under-23 division.
Gitapos niya ang lumba sa oras nga 56:06 sunod ni Jigo Mendoza, kinsa maoy nidaog sa bulawan sa oras nga 54:54. Sila si Ed Mhel John Flores ug Eric Apenar parehong midaog og bronze medal. (BANAT PALARO)
- Latest
