TBA-Power 40 cagefest buksan sab karong adlawa

 CEBU, Philippines -  Siyam ka teams ang mosalmot sa Above-50 Basketball Tournament, ang hinugpong puwersa sa Talisay Basketball Association (TBA) ug sa Power Forty nga buksan karong adlawa didto sa Talisay City gym.

 Pangulohan kini sa host TBA, Power Forty, Bulacao, Punta Princesa, Lucky 40, Perez Trucking, Inayagan, Vintage ug AC Sports.

 Ang torneyo mosubay sa single round-robin format diin unom ka teams maoy moabante sa quarterfinals.

 Sugdan ang duwa sa alas-8 sa buntag diin magtakus  ang Vintage batok sa Bulacao ug sundan sa duwa  tali sa TBA ug Punta Princesa. Mosalida sab ang Power Forty ni Atty. Flor Yosores batok sa Inayagan, Naga ug dayon ang Perez Trucking batok sa Lucky 40.

 Ang maong torneyo gihimo pinaagi sa paningkamot nilang Atty. Yosores ug sa mga sakop sa organizing committee nga silang Randy Gavas, Bob Samson (tournament director), Chino Kalinga (commissioner) ug Edwin Dejacto  (technical committee).  Ang duwa pagahimuon matag Domingo didto sa Talisay City Sports Complex.  (BANAT NEWS)