Talk 'n Text, San Mig ilog sa crucial game-3

CEBU, Philippines - Napakita sa Talk 'N Text Tropang Texters  ug San Mig Coffee Mixers nga seryoso sila sa ilang kampanya alang sa PBA Commissioner's Cup title.

 Ning higayona, ang duha ka powerhouse teams maningkamot nga makuha ang krusyal nga  Game-3  tungod kay ang modaog moduol sa ilang tinguha nga masakmit ang laing PBA title alang sa ilang franchise.

 Ang Texters ug Mixers magsangka karong alas-8 sa gabii didto sa Smart Araneta Coliseum.

 Unang mipakita sa ilang abilidad ang Mixers sa Game-1 niadtong   Biyernes, 95-80, apan mibawos ang Texters sa Game-2 sa iskor nga 86-76 aron tablahon ang series, 1-1.

 Sa Game-3 karong gabii, ipaila usab ang "Best Player of the Conference" ug ingon man "Best Import."

 Duha ka players sa Texters nga silang Jayson Castro ug import nga si Richard Howell ang gihugon-hugonan nga maoy  modaog sa maong award.

 Inspirado karon ang duha nga mobanat og maayo aron hatagan ang Texters og 2-1 nga bentaha.

 Sa  ilang  bahin, gipaabot nga usbon ni coach Tim Cone ang iyang rotation  human sa makapakurat nga paglimita niya sa playing time nila ni James Yap ug Peter Jun Simon.

 Sila si Yap ug Simon wala kaayo makaduwa sa Game-2 nga maoy nakitang rason   nganong naglisud sa opensiba ang San Mig.