MJDL Brokers wala gihapo'y pilde

CEBU, Philippines - Pabiling hapsay ang record sa MJDL Brokers kinsa wala mabangbang sa pwersa gikan sa Enforcements Security Service (ESS) pinaagi sa ilang makabungog nga 123-90 nga kadaugan kaniadtong Huwebes sa gabii atol sa nagpadayon nga 2nd BOC-CIPU Cup basketball tournament didto sa barangay Tinago gym, ning dakbayan.

Sa laing bahin, wala makapatulo og singot ang Alin Brokers gawas lang atol sa ilang pag-warm up dihang wala mopatim-aw ang Rongcales Brokers ug napilde pinaagi sa forfeiture, ang ilang ikapitong sunod-sunod nga pagkasukamod. Mao sab kadto'y unang daog sa Alin kinsa adunay 1-6 nga baraha.

Tanang matang sa opensa ang gigamit sa MJDL aron yano kaayong midaug batok sa ESS. Epektibo sab ang ilang outside shooting ug fastbreak diin nakaamot gyud og puntos ang tanang 12 nila ka players kinsa mihimo'g labing daku 20 puntos ug labing gamay singko puntos.

Si Nico Laborte maoy nangu sa MJDL samtang midugang og 14 puntos si Janus Abellana samtang mitikdol og 12 puntos si Jonas       Cayanong.

Silang Noel Medalle ug Dandan Enriquez parehong miabuno og 10 puntos matag usa alang sa 6-0 nga MJDL Brokers kinsa nakigsawo sa liderato tali sa Petracorta-Rollway Brokers.

Ang ESS gipangulohan ni Andrew Yu ug gipalig-onan sab nilang Boodie Monteño, ex-CIT Wildcats big man Ramil Aniñon ug ex-USJR Baby Jaguars point guard Kenneth "Kentkyle Cuisine" Maningo kinsa pulos mibahug og double figures.

Si Maningo kanhi sakop sa Mactan Portmen nga maoy kampiyon sa BOC Invitational Tournament pipila na ka tuig ang milabay diin siya maoy back-up guard sa iyang idolo ang kanhi skipper sa UC Webmasters nga iyang sangay si Kenneth Kern Sesante.

Tungod sa maayong depensa sa ilawon, napugngan sa MJDL Brokers ngadto lang sa  sayis puntos si Ronan Cañete ug ang beteranong sentro ug Customs Police Jan Mose ngadto lang sa dos puntos. Ang ESS midailos na karon ngadto sa 3-3 nga baraha diin nagtabla sila uban sa Ecu Line ug Global.

Puntos matag usa:

MJDL (123) —   Laborte 20, Abellana 14, Cayanong 12, N. Medalle 10, Enriquez 10, B. Medalle 8, Rollon 8, Largosa 8, Elloren 8, Bensi 8, Amistoso 6, Gambe 5.

ESS (90) —     Yu 20, Gabica 15, Monteño 14, Maningo 13, Aniñon 12, Cañete 6, Abayon 4, Mose 2, Gacilos 2.   ((BANAT PALARO)