Impresibong kadaugan
PASAY CITY , Philippines – Gipamatud-an ni Donnie ‘Ahas’ Nietes (32-1-1, 20KOs) nga usa siya sa mga labing ngilngig nga boxing champion sa kasaysayan sa nasud.
Kini human gihimo niya ang labing impresibong kadaugan sa iyang karera sa kasamtangan pinaagi sa pagpaundang sa iyang Mexican rival nga si Moises ‘Moi’ Fuentes (19-2-1, 18KOs) sa main event sa "Pinoy Pride XXV:Rematch for Glory" niadtong miaging gabii didto sa SM Mall of Asia Arena.
Gawas sa pagdepensa sa iyang WBO light flyweight title ug pagsakmit sa prestihiyosong Ring Magazine Lineal championship belt, si Nietes mitubag usab sa daghang pangutana kabahin sa iyang legasiya.
Si Nietes miduol sa kasaysayan diin hapit na niya mabuak ang record ni anhing boxing legend Gabriel ‘Flash’ Elorde isip labing dugay nga reigning Filipino world boxing champion.
Sama sa una nilang sangka niadtong miaging tuig, nahimong kulbahinam ang sangka sa duha nga mituman sa ilang saad nga magera ibabaw sa ring.
Apan ning higayuna wala na miresulta pa sa draw ang away, inay mipatigbabaw na hinuon ang garbo sa Murcia, Negros Occidental.
Gidiktahan ni Nietes ang away gamit ang iyang hait nga jabs ug lateral movements, apan misukol og bodyshots si Fuentes.
Nahimong yawi alang ni Nietes ang seventh round diin giluya niya si Fuentes dihang mipasud siya og mga bangis nga kombinasyon.
Miabot ang oras sa kadaugan alang sa Pinoy champion sa ninth round dihang mipasud siya og kusug nga kombinasyon sa ulo nga mipatugpa ni Fuentes sa canvass. Gikuhaan hinuon og uno punto si Nietes dihang gitiwasan niya si Fuentes kinsa niadtong higayuna nagluhod pa ibabaw sa ring.
Sa pagpadayun sa away, daling gibalikan og kulata ni Nietes si Fuentes kinsa natumba pa og kausa sa wala pa ang ikatulo ug katapusang knockdown nga mitapos sa away sa 2:56 sa ninth round.
“Game plan gyud to namo nga hinay-hinayon siya og kulata,†matud pa ni Nietes atol sa post-fight press conference. “Nalipay ko kay natumba nako si Fuentes ug natubag nako ang mga isyu sa uban nga wala koy power ug stamina.â€
Sa iyang bahin, si ALA Promotions President and CEO Michael Aldeguer mitug-an nga plano karon nila nga paawayon si Nietes alang sa unification bout o pagsaka og timbang sa two-division world champion. (BANAT PALARO)
- Latest
