Fitness festival gitakda Mayo 31 sa Pueblo Verde

CEBU, Philippines -  Agi'g pagtimaan sa  ika-20 anibersaryo, ang AboitizLand Inc.  sa Aboitiz Group mopahigayon og Fitness Festival karong Mayo 31 diha sa Pueblo Verde.

 Ang kalihukan gipaluyohan sa Metafit, ang  malampusong fitness boot camp sa Pilipinas nga ubos sa  pagpangulo ni Coach Alan Choachuy, ang finalist sa Pinoy Biggest Loser Season 1.

 Daghang mga kalihukan ang nakalinya alang sa usa ka adlaw nga kalihukan.

 Adunay fitness fair exhibit nga naglatid sa nagkadaiyang gym ug fitness organizations gikan sa ala-1 sa hapon hangtod sa alas-9 sa gabii.

 Sentro sa maong kalihukan  mao ang "Metafit Challenge" sugod sa alas-2 sa hapon.

 Ang Metafit Challenge usa ka metabolic fitness relay nga himuon sa mga koponan o grupo. Matag team kinahanglan mokompleto sa tahas nga gihatag kanila sa Metafit coaches sa lima ka nagkalain-laing estasyon. Ang team nga adunay labing taas nga accumulated points maoy modaog.

 Gawas sa Metafit Challenge,  may  ipahigayon sab nga individual ug doubles run alang sa 3K, 5K ug 10K.  Ang group run langkuban og labing daghan upat ka miyembro matag team. Matag miyembro sa grupo hiktan gikan sa pagsugod hangtod mahuman ang lumba.

 Human sa lumba, ang tanang mga partisipante trataron og usa ka libreng zumba ug  hiphop dance party.

 Special prizes ug awards ang ihatag gikan sa mga tigpasiugda.