Team Bastida milangkat korona sa As-Es B.A.R cagefest

CEBU, Philippines -  Gipamatuod sa Team Bastida nga sila ang labing lig-ong koponan dihang ilang gilubong ang Team Alcover, 102-80 aron maangkon ang korona sa As-Es B.A.R. First Conference basketball tournament dili pa dugay didto sa Benjamin Solon Memorial Gym sa barangay Cogon Ramos, Cebu City.

 Determinasyon ug teamwork maoy gihimong hinagiban sa Team Bastida pagpuhal sa karibal nilang Team Alcover.

 Sa gilauman, si Louie Tanggol gihapon ang topscorer sa champion Team Bastida nga mipabuhagay og 28 puntos nga igo na kaayo alang kaniya aron ilhon isip MVP.

 Unang miarangkada ang Team Alcover diin nakabentaha sila'g tres puntos, 9-6, apan sila si Tanggol ug Rocky Bacalso nagpuli-puli'g pamuntos aron  hatagan ang Team Bastida og 15-9 nga labaw sa tunga-tungang bahin sa first period.

 Ang Team Bastida mipatuman og solidong depensa sa second quarter hinungdan nga naglisud ang Team Alcover pagkuha'g iskor.   Nangigo sab si Reynolds Zamora, kinsa mikulit og otso puntos sa maong kuwarter. Ang tira ni Noel Godiz dayon kapupos sa oras maoy mitak-op sa first half, 47-36, pabor sa Team Bastida.

 Sa nahabiling duha ka kuwarter, hinay-hinay na nga giinat sa Team Bastida ang ilang labaw hangtod nga nalangkat ang korona.

 Si Bacalso mitimbre'g 21 puntos, samtang si Zamora mitikdol og 16 puntos ug si Jojo Pada miantog og 10 puntos alang sa kadaugan.

 Ang Team Alcover gipangulohan ni Gerald Ylaya pinaagi sa iyang 17 puntos, gisundan ni Lemar Alcover nga adunay 13 puntos, samtang sila si Kirby Raboy ug James Yap Villarba nagkumboya'g 23 puntos. Ang three-point king nga si Randyll Roncal nalimitahan lang ngadto sa otso puntos.

 Sa sayo pa, ang Team Endab mipilde sa Team Lim, 97-87 aron maangkon ang ikatulong puwesto sa maong torneyo nga gipaluyohan ni Adlaon barangay captain Elvis Narra.

PUNTOS MATAG USA

(Unang duwa)

 TEAM ENDAB (97) – Mendoza 29, Coyoca 19, Sebrero 13, Endab 12,  Sidro 12, Aragon 12.

 TEAM LIM (87) –  E. Ferrer 25, Birao 20, Dandan 18, Alesna 11, T. Ferrer 6, Jurado 3, Lim 2, Tañajura 2.

Ikaduhang duwa:

 TEAM BASTIDA (102) – Tanggol 28, Bacalso 21, Zamora 16, Pada 10, Rodriguez 9, Obcial 5, Lanutan 4, Sabay 4, Godiz 2, Bastida 2, Aniñon 1.

 TEAM ALCOVER (80) –  Ylaya 17, Alcover 13, Raboy 12, Villarba 11, Roncal 8, Capoy 6, Piñas 4, Colonia 3, Secuya 2, Aliñabon 2, Go 2.  (BANAT PALARO)