Major upset gihimo sa Global vs. Ecu Line
CEBU, Philippines - Major kon makapakurat nga "upset victory" ang gihimo sa Global human sila modaog og usa ka lugas batok sa top contender Ecu Line, 104-103 kaniadtong miaging Martes atol sa nagpadayon nga 2nd BOC-CIPU basketball tournament didto sa barangay Tinago gym, ning dakbayan.
Sa laing duwa, midaug unta sa duwa ang JVD Brokers apan napilde sa point-deduction batok sa Ynah Brokers, 80-77 tungod sa ilang lagda nga adunay "minus" nga singko puntos matag player nga mo-absent o dili moduwa nga walay igong rason.
Nagmangtas si Alex Plando kinsa misakmit og 29 puntos ug laing tulo ka kauban ang mibahug sab og double figures.
Ang Ecu Line nga maoy giila nga usa ka lig-ong contender sa torneyo, gipangulohan sa ilang power forward nga si Gerry Singson kinsa wala mabangbang sa iyang 32 puntos. Anugon ang maong kapildehan ilabi alang kang Primitivo Mondin kinsa miamot og usa ka dosena.
Sa laing duwa, gisalbar ni Tata Laborte ang Ynah Brokers kinsa mibahug og 23 puntos apan siya lang maoy bugtong player nga mi-iskor og double figures sa ilang team.
Upat ka players sa JVD ni team owner Don Dejaresco ang miposa og double figures lakip ang ilang starting guard nga si Francis Ibo kinsa mihimo'g 12 puntos nga usa sa labing maayo niyang gipakita sulod sa unom ka duwa.
Mipasalig si Ibo nga mamawi sa sunod duwa aron bisan pa og duna sila'y deduction, dili gihapon kini makaapekto kanila ilabi na kay nagkaduol na ang quarterfinal round.
Ang Global, Ynah ug JVD, nagtabla na karon sa 2-3 nga baraha samtang ang Ecu Line adunay 3-3 nga baraha. (BANAT PALARO)
- Latest
