Cebu Elite Camp Clinic gitapos na
CEBU, Philippines - Gitapos na kaniadtong Abril 30 ang first batch sa gipahigayon nga CEBU Elite Camp basketball clinics diin nakadawat og certificates of completion ang mga bata nga misalmot sa maong clinic nga gipasiugdahan ni Camp director Chino Uy.
Ang CEBU, acronym alang sa Character Excellence Basketball Unlimited, matawag nga maoy labing malamposong basketball clinic dinhi sa Sugbo sa milabay nga daghang katuigan tungod kay nakadani kini og 425 ka mga batan-ong mahiligon sa basketball dinhi lang sa Sugbo ug laing 100 ka estudyante didto sa Dumaguete City (30) ug sa Guihulngan (70) sa Negros Oriental.
Ang kinatibuk-ang 525 ka campers nakadawat og certificates ug ang uban kanila nakadawat og medalya isip individual awards.
Mao sab ang tanang mga misalmot sa lain-laing dapit sa Sugbo diin gipahigayon ang clinic.
Ang mga Best Campers gikan sa tanang pito ka dapit diin gipahigayon ang clinic, nakadawat sab og tropeyo ug lima niini dinhi sa Sugbo samtang ang duha didto sa Negros.
Duna sa'y mga individual awards nga gipanghatag sa lima kadapit diin gihimo ang clinics nga mao ang mosunod; Cebu Coliseum, USC South, USC North, Talamban ug sa JCenter Mall diin dunay gipili nga Best Camper samtang ang laing mga awardees mao ang Most Improved Camper, Best in Dribbling, Best in Shooting, Best in Passing ug Best in Lay-up.
Gipahibalo ni Uy nga mosunod dayon ang second batch sa clinic sugod karong adlawa hangtod sa Mayo 30 didto gihapon sa Cebu Coliseum.
Ang mga karaang estudyante nga nakasalmot na sa first batch igo na lang mobayad og P1,500 tungod kay naa naman sila'y bola ug upper jersey inay unta sa orihinal nga presyo nga 1,850.
Ang mga trainors sa CEBU Elite clinics naglakip kanilang kanhi USC Warriors point guard Vernini Tangarorang, Jed Cabellon, Jezar Esperat, Galimar Largo ug Sesum Asignar. (BANAT PALARO)
- Latest
