SHS-Ateneo kampiyon sa Talk 'N Text Tatluhan
CEBU, Philippines - Midaug ang Sacred Heart School-Ateneo de Cebu 1 batok sa University of Southern Philippines Foundation-A (USPF) sa iskor, 8-6, aron sakmiton ang titulo sa Talk ‘n Text Tatluhan basketball tournament didto sa barangay Opao gym sa dakbayan sa Mandaue.
Naglabaw unta ang USPF, 4-2 apan natabla kini sa SHS-Ateneo pinaagi ni Andrew Velasco human sa iyang two-point basket.
Silang Josh Sinclair ug Steven Co maoy mihatag og labaw sa SHS-Ateneo ug natabla sab kini pag-usab sa USPF pinaagi sa basket ni John Paul Isok sa iya sab nga two-pointer, 6-all, sa kataposang 54 segundos ang duwa. Ang free throw ni Sinclair sa nahibiling 48 segundos maoy nagpalabaw sa SHS-Ateneo ug ang basket ni Co maoy nagselyado sa ilang kadaugan.
Ang SHS-Ateneo nakadawat og 10 mil pesos nga premyo ug libreng biyahe ngadto sa Manila alang sa Talk ‘N Text Tatluhan national finals unya sa Mayo 24-25.
Miabante sa finals ang SHS-Ateneo human sa ilang 5-1 record atol sa cross-over quarterfinals diin sila maoy nahimong topseed sa Group A.
Ilang gipilde ang Red Masters, 9-3 sa quarterfinals sa wala pa sila maka-ipsot batok sa X-Men Passerelle, 13-11 pinaagi sa overtime atol sa semifinals.
Ang USPF sa laing bahin, maoy nahimong second seed sa Group A ug ilang gipilde ang third seed sa Group B ang Choi BB Jerd Kinu, 17-9 atol sa quarterfinals. Gipilde sab sa Panthers ang SHS-Ateneo 2 sa iskor, 9-6 sa semifinals.
Ang Talk ‘N Text Tatluhan usa ka tornmeyo alang sa Under 18 o mga players nga natawo niadtong tuig 1996 o mas bata pa.
Usa kini ka kalihokan sa Samahang Basketbol ng Pilipinas (SBP) pinasubay sa 3-on-3 sa FIBA. (BANAT PALARO)
- Latest
