Mayweather daog apan naglisud

CEBU, Philippines - Pabilin nga way pilde si Floyd Mayweather human na usab siya midaog, apan dili miagi siya og kakuyaw human siya tagai og lisud nga sangka ni Argentinean brawler Marcos Maidana kagahapon didto sa MGM Arena sa Las Vegas.

Ang giilang pound-for-pound king nakatilaw og lisud nga pagsuway human siya makadawat og mga kusug nga atake gikan ni Maidana kinsa agresibo nga mipakita sa iyang tinguha nga pahamtangan sa labing una niyang pilde ang Amerikanong boksidor.

Si Mayweather mi-usa sa WBC ug WBA welterweight title

Itandi sa mga miaging sangka ni Mayweather, ang American star nakasinati og grabeng atake gikan ni Maidana, apan nabuhatan ra gihapon niya kini og paagi aron makaikyas sa mga lisud nga sitwasyon ug malikayan ang mga bomba sa Argentinean sa boxer.

Human sa away, si Mayweather kinsa gipaabot unta nga sayun nga mudaog nanginahanglan og majority decision nga daog diin duha lang sa tulo ka mga hurado ang mipabor kaniya 117-111 ug 116-112, samtang ang ikatulong judge mitabla sa score 114-114.

"It was a tough, competitive fight," matud pa ni Mayweather kinsa nagisian sa iyang kilay. "I normally like to go out there and box and move. But he put pressure on me. I wanted to give the fans what they wanted to see so I stood and fought him."

Nakadawat hinuon og mga ‘boo’ gikan sa mga fans didto sa Las Vegas si Mayweather tungod sa ilang pagtuo nga si Maidana ang angay nga midaog sa away.

Si Mayweather bukas hinuon sa posibilidad nga makig-rematch ni Maidana aron ipakita nga siya gyud ang kusgan nga boksidor ug mapapas ang pagduda sa mga fans. (BANAT PALARO)