Blazers sulod na sa west semis

CEBU, Philippines - Giluwas ni Damian Lilliard ang Portland TrailBlazers pinaagi sa iyang buzzer-beating three-pointer, 99-98 batok sa Houston Rockets sa Game-6 sa first round playoff series aron  moabante ngadto sa Western Conference semifinals kagahapon didto sa Moda Center sa Portland, Oregon.

Dihang nagkaguliyang ang mga fans sulod sa Moda Center, ang homecourt sa TrailBlazers, gibawi ni Damian Lillard ang public address microphone ug misyagit "Rip City!"

Mao pa lang kini ang unang higayon sa Portland  nga miabante sa Western Conference semifinals  sud sa 14 ka tuig.

Labing uwahing higayon nga nakasulod ang Portland sa playoffs niadto pang 2011. Kanunay silang matagak sa first round sud sa unom ka higayon ug wala pa makaabante sa second round sukad sa 2000.

Si Dwight Howard mipasulod sa iyang upat ka free throws aron tablahon ang iskor, 91-all sa wala pa ang iyang pinabandang tirada nga maoy naghatag sa Rockets og labaw sa nahabiling 3:04 sa duwa.

Mibawos pag-iskor si Robin Lopez aron ilogon og balik sa Blazers ang labaw, 94-93 sa katapusang 2:15 sa final period.

Nakuha pagbalik sa Rockets ang labaw, 96-94 human makompleto ni Howard ang iyang three-point play. Gitabla sab kini dayon ni Nick Batum pinaagi sa iyang fade-away jumpshot, 96-all sa nahabiling 39.9 segundos.

Si Chandler Parson miiskor og reverse lay-up sa katapusang 0.9 aron hatagan ang Rockets og labaw sa wala pa moposa si Lillard sa iyang buzzer-beating triple alang sa kadaugan sa Blazers.

Si Lilliard mikulit og 25 puntos, apan si LaMarcus Aldridge maoy nangu sa Portland pinaagi sa iyang 30 puntos. Ang Portland maoy makigsangka sa modaog tali sa San Antonio Spurs ug Dallas Mavericks kansang series misangpot sa Game-7.

Si James Harden maoy nangu sa Rockets nga mikamada'g 34 puntos, samtang si Howard adunay 26 puntos.

Sa laing duwa, ang Dallas Mavericks midaog batok sa San Antonio Spurs, 113-111 ubos sa pagpangulo ni Monta Ellis, kinsa mirehistro'g 29 puntos.

Si Dirk Nowitzki miposa'g 22 puntos alang sa Dallas aron makapugos og Game-7 sa ilang first-round series nga adto na ipahigayon sa AT&T Center sa San Antonio, Texas.  Si Tony Parker maoy nangu sa Spurs nga mipabuto'g 22 puntos.

Sa laing aksiyon,  si Deron Williams miposa'g 23 puntos  aron pangulohan ang Brooklyn Nets ngadto sa 97-83 nga kadaugan batok sa Toronto Raports aron sab makapugos og Game-7.

Ang modaog sa Game-7 ugma  makigsangka sa   Miami Heat. (BANAT NEWS)