Petracorta-Rollway 5-0 na sab
CEBU, Philippines - Midaug na sab ang Petracorta-Rollway Brokers human ilang gipukan ang Enforcement Security Service (ESS) sa iskor, 108-99 kaniadtong Martes sa gabii sa nagpadayon nga 2nd BOC-CIPU basketball tournament didto sa barangay Tinago gym, ning dakbayan.
Ang Petracorta-Rollway kinsa aduna nay 5-0 nga baraha, nakigsawo sa liderato uban sa MJDL Brokers. Sunod semana hisayran na kung kinsa kanila maoy makakuha sa unang pwesto.
Sa laing bahin, midaug nga walay singot ang Global dihang mi-forfeit sa ilang duwa ang wala pay daog nga Rongcales Brokers.
Mao kadto'y unang daog sa Global sa ilang upat ka duwa (1-3) ug mitidlum ngadto sa labing ubos nga pwesto ang Rongcales sa ilang 0-6 nga baraha ug sila na lang duha sa Alin Broker ang wala pa makatilaw og daog.
Si Takloy Moral maoy nangu sa Petracorta-Rollway sa iyang 29 puntos ug midugang si Francis Palero og 23 puntos. Laing naka-double figures mao silang Reden Villaronza ug Julius Tarona sa ilang 19 ug 15 puntos matag usa.
Ang ESS kinsa midailos na ngadto sa ika-upat nga pwesto sa ilang 3-2 nga baraha, gipangulohan sa ilang sentro nga si Jan Mose kinsa mibahug og 23 puntos samtang midugang si Kenneth Maningo og 20 puntos.
Laing upat ka players sa ESS ang mibahug sab og double figures.
Puntos matag usa:
Petracorta-Rollway (108)— Moral 29, Palero 23, Villaronza 19, Tarona 15, Manlosa 7, Solidarios 6, Generalao 4, Olloves 3, Petracorta 1.
ESS (99) — Mose 23, Maningo 20, Yu 13, Aniñon 13, Monteño 10, Cañete 10, Gabica 6, Gacilos 4. (BANAT NEWS)
- Latest
