Pacubas milubong sa Worldwide
CEBU, Philippines - Ang Team Pacubas yano kaayong miiskor og daog pinaagi sa paglubong sa Worldwide, 70-55 sa Philwood/Interope Inter-company Basketball League 2014 didto sa ilang basketball court sa dalan C. Padilla, ning siyudad.
Mipabuhagay dayon og mga puntos ang Pacubas sa sayong bahin sa duwa aron molansang og 10 puntos nga bentaha paghuman sa first quarter, 19-9.
Sa pagpangulo ni Jesson Zalde, ang Pacubas walay kukaluya nga mipupo'g mga puntos hinungdan nga mibingat ang ilang labaw sa halftime, 31-17. Giduwa-duwaan na lang sa Pacubas ang Worldwide sukad niadto hangtod natugkad nila ang kadaugan.
Si Zalde maoy topscorer sa Pacubas nga mikulit og 14 puntos, sila si Joseph Yu ug Jeffrey Yu mitikdol og 12 puntos matag usa, samtang si Samson Malandag mitimang og 10 puntos.
Bugtong si Jory Togris lang ang miiskor og double figures alang sa pilderong Worldwide pinaagi sa iyang 23 puntos. Apan nakawang lang ang iyang dakung puntos kay kulang siya'g maayong suporta gikan sa kaubanan niya.
Sa laing aksiyon, midaog sab ang Interope human ilang gipilde ang Philwood sa iskor nga 80-74.
Gipangulohan ni Noel Estrada ang kadaugan pinaagi sa iyang 16 puntos, gisundan ni Jorge Acar nga mitimbre'g 12 puntos ug R. Viajero nga miariya'g 10 puntos.
Naggukod ang Interope sa unang duha ka kuwarter ug diha na sila misalida sa second half, ilabi na sa final period aron maangkon ang makutas nga kadaugan.
Si F. Estrada mikadlit og 16 puntos alang sa Philwood, kansang duwa nagusbat human sa mainitong rally sa Interope.
Laing upat ka players sa Philwood ang mitimbre sab og double figures alang sa ilang kapildihan. (BANAT NEWS)
PUNTOS MATAG USA
Unang duwa:
PACUBAS (70) – Zalde 14, Jo. Yu 12, Je. Yu 12, Malandag 10, Lonag 6, Cuizon 5, Jason 4, Penales 2, Guano 2, Paden 2.
WORLDWIDE (55) – Togris 23, Batulan 5, Carten 5, Cabading 3, Canoy 3, Jakosalem 3, Repdos 2, Cabalida 2, Salinas 1.
Ikaduhang duwa:
INTEROPE (80) – N. Estrada 16, D. Acar 12, R. Viajedor 10, J. Viajedor 9, G. Acar 7, Garsula 4, Caballero 4, Velasco 2, A. Estrada 2.
PHILWOOD (74) – F. Estrada 16, Eden 15, Hondayan 13, Avendanio 12, Caballero 12, J. Estrada 2, Al Estrada 2, Garsula 2.
- Latest
