Heat vs. Blazers sa NBA Finals?

CEBU, Philippines - Dili sayon pagtukib o paghulagway kun unsa gyu'y mahitabo niining first round sa NBA Playoffs.

 Apan daw akong nakita sa dagan sa playoffs nga nagkadipo-dipo na ang mga topseeded teams. Nadani ako sa pagpagawas ning akong panahom nga adunay posibilidad nga Miami Heat ug Portland TrailBlazers ang mag-abot sa NBA Finals nga gitakda  sa unang semana sa Hunyo.

 Ania ang pipila ka mga rason.

 Ang ilang pagka-beterano ug championship experience maoy labing hait nga hinagiban sa San Antonio Spurs sa ilang kampanya sa playoffs, apan ang ilang pangeradon maoy makapilde kanila aron tagakon sa Dallas Mavericks.

 Aduna say championship experience kining Mavericks ug kun nahinumdum kamo sa Miami-Dallas finals, naglabaw pa ang Heat og 15 puntos sa fourth period. Mi-rally ang Mavs pinangulohan nilang Dirk Nowitzki, Tyson Chandler ug Jason Kidd. Si Dirk na lang karon maoy nagpabilin kay si Chandler mibalhin sa New York Knicks

 Ang Indiana Pacers nga maoy topseed sa Eastern Conference biya na karon sa No.  8 Atlanta Hawks, 1-2 human mapilde sa Game-3, 85-98 didto sa Philips Arena sa Atlanta, Georgia. Ang Game-4 adto  gihapon duwaon sa Atlanta.

 Dili consistent silang Paul George, Roy Hibbert ug David West ug mao kana karon ang angay hinuktokan sa Pacers kun  unsaon pagsulbad.

 Biya na sab karon ang No. 2 sa Western Conference  nga Oklahoma City Thunder, 1-2 human mabihag sa Memphis Grizzlies pinaagi sa overtime, 95-98.

 Gawas lang tingali sa sangka sa L.A Clippers ug sa Golden State Warriors nga hayan molahos sa Game-6 o Game-7.   

Nagpakita nga dominado sa TrailBlazers ang Houston Rockets. Sa ilang 2-0 nga labaw, mahimutang na karon sa delikado ang Rockets kay ang mosunod nga duha ka duwa adto man sa Portland, Oregon.

 Didto sa East, maayo ang gipakita sa Washington Wizards nga hayan moharos sa Chicago Bulls sa first round.

 Ang Heat ug Blazers nagdala og kainit sa ilang monickers. Busa kun maghisgot kita'g kainit ilabi na karong summer, kinsa pa may atong mahimong ehemplo kun dili ang bola nga nagkayo sa Heat ug ang init nga riles sa tren sa Blazers.

 Layo pa hinuon sa kahumanan kining first round, apan swerte na kaayo ang team karon nga makapugos og Game- 7 sa playoffs.