Bangis ni Pacman mibalik

CEBU, Philippines - Way duda nga napakita ni Manny Pacquiao nga wala gihapon nawala ang iyang kabangis human niya gidominaran ang iyang sangka batok ni Timothy Bradley aron masakmit ang WBO welterweight title kagahapon didto sa MGM Arena sa Las Vegas.

Sa migawas nga resulta sa compubox, si Pacquiao migawas nga mas asintado itandi ni Bradley kinsa miangkon nga naglisud siya tungod sa kapaspas sa kumo sa Pinoy boxing star.

Si Bradley kinsa nakatilaw sa labing una niyang pilde mas daghan og gibuhian nga kumo, apan si Pacquiao maoy mas limpyo nga nakapatugpa sa iyang kinumo.

Si Pacquiao mikonektar  og 198 sa iyang 563 ka mga kinumo nga gilabay, samtang si Bradley igo lang nakapatugpa og 141 sa iyang 627 nga sukmag.

Ang kanhi eight-division world champion migawas nga 35% nga mas epektibo itandi ni Bradley nga adunay 22%.

Kun power punch ang hisgutan, si Pacquiao mipabuto og 148 sa iyang 344 ngadto ni Bradley, samtang ang American boxer igo lang mipaigo og 109 ka kusug nga kumo sa iyang 340 nga gibuhian.

Kini ang gitudlong rasun sa 116-112, 116-112 ug 118-110 nga unanimous decision nga kadaugan ni Pacquiao gikan sa mga hurado.

Ang Pinoy boxing superstar miangkon nga mas lisud si Bradley sa katapusan nilang sangka itandi sa ilang unang sangka niadtong tuig 2012 diin napilde siya pinaagi sa split decision.

Wala usab miprotesta si Bradley kinsa miangkon nga mas kusgan si Pacquiao, apan ang 30-anyos nga boksidor mipahibalo nga nakahiagum siya og injury sa tiil nga nakaapekto sa iyang inawayan. (Lemuel P. Maglinte)

Amazon Festival Run gitakda sa Mayo 1

Kapin sa 1,000 ka runners ang gilaumang mosalmot sa labing unang "Amazon Festival Run" sa Mayo 1 didto sa The Terraces sa Ayala Center-Cebu.

Gipasiugdahan sa Amazon Events, ang maong lumba magsilbeng fund- raising project alang sa ICanserve Foundation Inc.

"We are targeting 1,200 or more. This event will be more festive compared to the other color run. This race is a combination of fun and competition," matud pa ni Kathleen Ramos, usa sa mga organizers.

Ang lumba gibahin sa 6K, 12K ug 21K categories. Dul-an sa P40,000 nga ganting salapi ang giandam alang sa mga mananaog.

Ang tanang finishers sa 21K makadawat og specially-designed finisher's medal.

Ang host ug commercial model nga si Marc Nelson ug fitness enthusiast ug media personality Dyan Castillejo mosaksi sa maong kalihukan.

Ang entrance fee nagkantidad og P750 sa 21K, P650 sa 12K ug P550 sa 6K, libre na ang singlet, race bib, sunglasses ug certificates. Mahimong magparehistro sa Runnr sa Ayala Center-Cebu ug sa A Runner's Circle sa Raintree Mall. (Lemuel P. Maglinte)\

Managsuong Pagara mipaundang sa ilang kontra

Managsuong Pagara nga sila si Jason (El Niño) ug Albert (Prince) parehong miiskor og impresibong kadaugan human ilang gipaundang ang tagsa-tagsa nilang kaatbang niadtong Biyernes sa gabii didto sa Maasin City gymnasium sa Maasin, Southern Leyte. Ang WBO International light welterweight champion nga si Jason (32-2, 19KOs) mipaundang ni Rusmin Kie Raha (12-2,4KOs) sa seventh round sa gikatakda nilang 10 ka hugna nga kumbati.

Gidabo-dabohan dayon ni Jason ang Indonesian fighter nga si Raha sa opening round, apan misukli og mga counter punches ang bisitang boksidor ngadto sa ALA Boxing star.

Nahagit si Jason ug mipatugpa kini og mga solidong bodyshots hinungdan nga miyaka si Raha sa ikapitong round sa 1:52 sa maong round.

Hinuon, dili sama sa iyang maguwang, sayong gidispatsar ni Albert (19-0, 13KOs) ang iyang kontra nga si Skak Max (6-13, 6KOs) nga milungtad lang sa third round.

Ang 20-anyos nga si Pagara mipatugpa og one-two combination ngadto sa Max, kinsa wala na mibawos nga nakapaaghat ni referee Ben Necesario sa paghunong sa away sa 1:33 sa third round.

Lain pang mga boksidor nga midaog mao sila si Brian Lobitania batok ni Boyce Sultan, Richard Barriors batok Lito Dante, Elmo Traya batok Rey dela Cruz ug Wanmah Waminal batok ni Dondon Amparado. (BANAT NEWS)