JRU mi-walkout sa Peña Cup

 CEBU, Philippines - Mi-walkout ang bisitang  Jose Rizal University (JRU) Bombers  atol sa ilang championship game batok sa Southwestern  University (SWU) Cobras sa  1st Mayor Lani Peña Cup basketball tournament didto sa Minglanilla Sports Complex.

 Nahitabo kini sa nahabiling 31 segundos sa third period diin ang JRU, 66-63 dihang Daryl Goloran sa SWU mihasmag ug misuntok sa usa ka player sa JRU hinungdan nga ang mga players sa duha ka kampo daling midagan sa tunga sa korte.

 Nakalma ra hinuon ang mga players human  gipahibalo sa table officials nga si Goloran gi-eject sa duwa. Ang coach sa JRU ug   kanhi Aerial   PBA star nga si Vergel Meneses maoy nangu sa iyang players nga milakaw sa center court ug miwara-wara sa ilang mga kamot sa wala pa mobiya sa korte.

 Dihang misakay na ang Heavy Bombers sa ilang service bus, ang Cobras nagpabilin sa korte aron modawat sa ilang P30,000 nga premyo isip kampiyon.

 Sa iyang habig, si Meneses mipasabot nga wala na sila motiwas sa pisikal nga duwa kay madadlok siyang mapiangan ang iyang mga players ning panahona nga nagkaduol na sab ang laing NCAA season.

 Sa sayo pa, ang Raphael's Café midaog batok sa UV Green Lancers-Team B, 92-89 sa overtime. (BANAT NEWS)