SWU, JRU magtakus sa titulo

CEBU, Philippines -  Ang Southwestern University (SWU) Cobras ug ang Jose Rizal University (JRU) Heavy Bombers maoy mag-abot sa kampiyonato sa 1st Mayor Lani Peña Cup basketball tournament didto sa Minglanilla Sports Complex.

 Miabante ang SWU sa finals human ilang gidabo-dabohan ang Raphael's Café sa iskor nga 112-65 ug ingon man ang JRU dihang gitaktak nilang University of the Visayas (UV) Green Lancers, 85-70.

 Silang Adams Mohammed ug ang come-backing nga si Justin Aboude maoy nangu sa Cobras sa ilang 23 ug 20 puntos matag usa.

 Ang  JRU sa ilang bahin, gipangulohan ni Michael Mabulac kinsa miburak og 15 puntos, samtang ang natagak nga UV gipangulohan sab ni Steve Cedrick Akomo sa iyang 18 puntos.

 Ang UV ug Raphael's Café maoy magsangka alang sa ikatulong pwesto ning maong torneyo nga gipasiugdahan sa Minglanilla Sports Commission ubos ni committee chairman ug councilor Cording Mejias.

 Ang kampiyon mobulsa og P30,000, ang second placer makadawat og P20,000, samtang ang third makaangkon og P10,000.

 Ang mo-okupar sa ikaupat makadawat og consolation prize nga P5,000.