SWU, UV nidaog dayon sa 1st Mayor Lani Peña Cup

CEBU, Philippines -  Midaog dayon sa ilang unang duwa ang higpit nga karibal sa local basketball scene ang Southwestern University (SWU) Cobras ug ang University of the Visayas (UV) Green Lancers sa pagbukas sa 1st Mayor Lani Peña  Cup niadtong Martes sa gabii didto sa Minglanilla  Sports Complex.

 Unang midaog ang  SWU Cobras dihang ilang napugngan ang  pagpangataki sa Jose Rizal University (JRU) Heavy Bombers, 69-53 samtang  ang UV Lancers  midaog sab sa Raphael's Café, 89-80.
 Ang Cobras gipangulohan ni Landry Sanjo, kinsa miiskor og 22 puntos, gisundan ni Mark Jayven Tallo  sa iyang 15 puntos ug Daryl Goloran sa iyang 10 puntos.
 Sa laing bahin, ang batan-ong  pointguard nga si Jun Kent  Manzo maoy nangu sa Lancers  pinaagi sa iyang 19 puntos.
 Ang Raphael's Café  gipangulohan  ni Abulaiz 'Popoy'  Sulaiman  nga mipupo'g  22 puntos, sila si Sid Cortes ug team owner   Christian Senining miamot og 11 puntos matag usa.
 Ang torneyo mosubay og single round robin diin   ang top two teams maoy moabante sa finals. Ang No. 3 ug No. 4 teams mag-ilog alang sa ikatulong dapit. 
 Ang kampiyon makadawat og P30,000,  ang second placer makaangkon og P20,000, ang third ug fourth placers mobulsa'g P15,000  ug P5,000 matag usa. (BANAT NEWS)