Durant mipabuto'g 38 puntos, Jordan naapsan na
CEBU, Philippines - Naapsan na ni Kevin Durant sa Oklahoma City Thunder ang rekord ni Michael Jordan nga miiskor og labing menos 25 puntos matag duwa sa 40 ka sunod-sunod nga higayon.
Kini human si Durant mipabuto og 38 puntos aron moabot ngadto na sa ika-41 ka higayon.
Apan mas dakung danyos ang gihimo nilang Goran Dragic ug Gerald Green nga nagkumboya'g 50 puntos alang sa Phoenix Suns nga mitunaw sa Thunder, 122-115 kagahapon didto sa U.S. Airways Center sa Phoenix, Arizona.
Si Dragic mitikdol og 26 puntos, samtang si Green mitimbre'g 24 puntos alang sa ilang kadaugan. Mihimo sab og career--high 22 puntos si P.J. Tucker lakip na usab ang iyang career-best nga upat ka three-pointers. Ang point guard nga si Eric Bledsoe mitikdol og 18 puntos aron tabangan ang Suns nga moabante'g usa ka duwa batok sa Memphis Grizzlies alang sa ikawalong luna sa playoff sa Western Conference.
Si Durant na karon maoy nakahimo sa ikatulong labing taas nga streak sa 25-point per game sa kasaysayan sa NBA nga giunhan ni Oscar Robertson sa 46 ka higayon niadtong 1963-1964 season.
Miamot og 33 puntos ug walo ka assists si Russell Westbrook alang sa Thunder, kinsa naglabaw na lang og usa ka daog batok sa Los Angeles Clippers alang sa ikaduhang puwesto sa West.
Ang Thunder katapusang naglabaw sa iskor nga 112-111 human sa free throws ni Durant sa nahabiling 2:39 sa fourth quarter. Mibawos ang Suns og sunod-sunod nga 10 puntos gikan nilang Markieff Morris ug Bledsoe aron moposte'g 121-112 nga labaw sa katapusang 20.7 segundos sa duwa.
Sa laing mga duwa, ang Miami Heat mipakaging sa New York Knicks, 102-91 bisan pa sa 10 ka triples ni J.R. Smith. ang Dallas Mavericks mipilde sa Sacramento Kings, 93-91, midaog sab ang San Antonio Spurs sa Memphis Grizzlies, 112-92. Gilubong sa L.A. Clippers ang L.A. Lakers, 120-97, ang Atlanta Hawks milubong sa Indiana Pacers, 107-88, gipanitan sab sa Golden State Warriors ang Utah Jazz, 130-102.
- Latest
