Gilas milatos sa PBA All Stars
CEBU, Philippines - Gipakita sa Smart Gilas Pilipinas national team nga seryoso sila sa ilang pangandam alang sa FIBA World Cup human nila gipukan ang PBA All Stars, 101-93, sa PBA All Star game kagabii didto sa SM Mall of Asia Arena.
Usa ka kusug nga third kuwarter ang gigamit sa Smart Gilas aron makuha ang momentum paingun ngadto sa otso puntos nga kadaugan.Ang PBA veteran ug Smart Gilas shooter nga si Gary David maoy gibayaw nga All Star MVP sa iyang 15 points lakip na ang duha ka triples.
Gipakita sa duha ka koponan nga pulos sila seryoso nga mudaog nga miresulta sa usa ka low-scoring game sa first half. Sila si David, Junemar Fajardo ug Larry Fonacier mipaarak og puntos nga maoy naghatag og 49-42 nga labaw sa national team sa halftime.
Pag-abot sa third period sila si Jeff Chan, Jayson Castro ug naturalized center Marcus Douthit na usab ang miarte sa opensa diin giinat nila ang labaw batok sa mas gagmay nga PBA stars, 68-52, sa 4:28 sa maong kuwarter.
Gikan didto wala na lingia pa sa Smart Gilas ang PBA selection ug milahus na sila hangtud sa kadaugan. Ang Gilas misakmit sa P100,000 prize money, samtang ang PBA stars nakakunswelo sa ilang P50,000 gikan sa dance showdown nga ilang gidag-an. (BANAT PALARO)
- Latest
