USC nalupig sa budget, SWU maoy nakakubit

CEBU, Philippines - Motuo mo'g sa dili, kanang Fil-Am sa Southwestern University (SWU) Cobras nga mipakita dayon og labok sa 1st  Mandaue City Inter-Collegiate and Inter-Barangay basketball tournament didto sa Mandaue City Sports and Cultural Complex diin siya maoy napiling MVP, didto na ang pikas tiil ug katunga sa lawas sa University of San Carlos (USC) Warriors.

Apan sa pagbalitok sa  hangin, ang Cobras maoy nakakuha kay gibuhian man ang alimango balik didto sa suba. Matod pa bitaw sa linya sa kanta "ako may nakakuha, ako ray makasuwa."

Si JC Parker kinsa maoy napiling MVP didto sa torneyo sa Mandaue niadtong Marso 25 ngadto sa Marso 29, gihatag kana ngadto ni Julian Macoy, ang kanhi coach sa University of  San Carlos apan tungod kay wala dayon mopasalig o mohatag ug igong "budget" ang Warriors tungod kay si Macoy mismo mananghid pa sa kaparian sa USC, gibunlot kini sa Cobras.

Nakig-chat kanako si Rey Yncierto, usa sa mitabang kang Macoy nga mahiluna si Parker sa Warriors nga anugon kuno kaayo nga wala makuha sa USC si Parker, usa ka Fil-Am nga nagbase didto sa Arizona. Sa pagka-karon matod pa ni Yncierto, dunay daghang mga maayong moduwa nga Fil-Am didto sa Arizona nga gustong moduwa sa kolehiyo dinhe sa Sugbo apan nagpaabot lang nga dunay mo-sponsor kanila sa ilang biyahe.

Si Parker kaliwat og taga Opon ug Minglanilla ug gidala siya dinhi sa Pilipinas ni Temyong Villanueva nga ilang silingan didto sa Lapu-Lapu City.

Karong Abril 12, dunay tan-awon silang Rey ug Julian didto sa Arizona nga duha ka players nga posibleng maoy dad-on dinhi ni Macoy alang sa USC. Hinaut nga nianang higayona, dili na kini masuhong.

Matod pa ni Yncierto, usa ka sakripisyo alang kaniya nga mobiyahe gikan sa Oxnard California ngadto sa usa ka lugar sa Arizona kay hasta sab ang iyang trabaho maapektohan apan lagi matod pa niya tungod sa gugma kun "for the love of basketball" diin kanhi sab siya usa ka collegiate star sa CCC (karon UC Webmasters) ug kanhi PBA player sa Pepsi Cola, iyang tabangan si Macoy nga iya sab nga paryente. (BANAT PALARO)