Parklane mopasiugda 3 ka lumba

CEBU, Philippines - Ang Cebu Parklane International Hotel mopasiugda'g tulo ka mga dagkung lumba karong tuiga nga kabahin sa ilang misyon pagtabang sa pag-promote sa turismo dinhi sa Sugbu.

Unang lumba mao ang Tri-Bantayan nga gitakda sa Mayo 3 didto sa lungsod sa Bantayan island.

Usa kini ka fund-raising event alang sa mga biktima sa bagyong Yolanda didto sa Bantayan island. Una usab kining higayon nga ang Bantayan mo-host og  triathlon race nga naglatid og 1K swim, 30K bike ug 7K run.   Aduna say relay competition alang sa all-male ug mixed categories.

Human sa Tri-Bantayan, isunod dayon ang Hunat Sugbu 4 didto sa Parkmall grounds sa Hunyo 22 ug  ang ikatulo mao ang 2nd Hunat Sugbu Triathlon didto sa Argao sa Septiyembre 21.

Ang Hunat Sugbu 4 maisip na nga tinuig nga running event sa Parklane nga ilang ipahinungod ngadto ni anhing Manuel 'Maning' Ting, kanhi presidente sa maong hotel.