RP-Gilas batok PBA All-Star karong gabii

 CEBU, Philippines - Hugot nga kompetisyon ang masaksihan sa mga hardcourt fans dihang magkuros ang dalan sa Smart Gilas Pilipinas national squad ug PBA All-Star karong gabii didto sa SM Mall of Asia Arena.

 Ang Smart Gilas-PBA All Star showdown sugdan sa alas-8 sa gabii, inig human sa skills challenge. Usa sab kini ka paagi aron matabangan ang Gilas sa ilang pagpangandam alang sa FIBA  World  Cup sa Agosto didto sa  Spain.

 Ang multi-titled coach sa PBA All-Star nga si Tim Cone miingon nga ang ilang pagduwa dili usa ka lingaw-lingaw kun dili tudloan og leksyon ang Smart Gilas.

 "It’s not going to be fun. It’s going to be serious. It will be a battle," matud pa ni Cone sa The Philippine Star.  Si Cone miingon nga mogamit sila og European style nga duwa aron masinati sa Smart Gilas  ang matang sa kompetisyon nga ilang atubangon sa World Cup.

 Sa laing bahin, ang skills challenge langkuban sa "three-point challenge" ug "slam dunk competition." Si Chris Tiu sa Rain or Shine Elasto Painters maoy reigning three-point king, samtang si Chris Ellis modepensa sa  iyang slamdunk title. (BANAT PALARO)