USJ-R gilubong sa UV sa Mandaue Mayor's Cup

CEBU, Philippines -  Nanghasi ang University of the Visayas (UV) Green Lancers sa final period ug  gilatos  nila  ang  University of San Jose-Recoletos (USJ-R) Jaguars, 78-60 atol sa duwa nila  sa  1st  Mandaue City Mayor’s Cup Inter-Collegiate and Inter-Barangay basketball tournament sa miaging gabii didto sa Mandaue City Cultural and Sports Complex.

 Nagpuli-puli sa pag-ilog og labaw ang duha ka kampo sa unang tulo ka kuwarter nga miresulta sa panagtabla, 34-all sa nahabiling 4:40 sa maong kuwarter, apan ang UV Lancers kalit nga miarangkada  diin mibunal sila'g walo ka sunod-sunod nga puntos aron moiskor og  49-42 nga bentaha paingon sa final period.
 Nanginit og maayo ang Lancers, kinsa mipauwan og mga puntos aron moposte'g 20 puntos  nga labaw, 78-58 sa nahabiling 20 segundos sa duwa.
 Ang big man nga UV Lancers nga si Hernal 'Wowie' Escocio, gisugat og daog sa iyang pagbalik og duwa diin miiskor siya og  14 puntos. Si Escocio nakaangkon og minor ankle injury ug wala makapakita'g aksiyon sa bag-o lang natapos nga Cebu  City Mayor's Cup niadtong Marso 21-24 didto sa Cebu Coliseum.
 Silang James Regalado ug Tyronne Suano maoy nangu sa Jaguars nga  parehong  mikawhat og 12 puntos.
 Sa opener,  ang Southwestern University (SWU) Cobras yano sab nga milubong sa Raphael’s Cafe sa iskor nga 85-60.
 Ang Cobras gipangulohan sa ilang import nga si Landry Sanjo, kinsa mitukob og  28 puntos, gisundan ni Mark Jayven Tallo sa iyang 11 puntos, samtang ang ilang bag-ong Fil-American  nga si JR Parker miamot og sayes puntos.
 Ang Raphael’s Cafe ni Christian Senining, gipangulohan ni Michael Cantonao pinaagi sa iyang 15 puntos.

Puntos matag usa

Unang duwa:
 SWU (85) – Sanjo 28, Tallo 11, Goloran 11, Pardo 9, Bregondo 6, Parker 6, Adams 5, Holper 3, Diapera 3.
 Raphael’s Cafe (60) – Cantonao 15, Cortes 11, Valencia 8, Hermosa 8, Olbedado 7, Sulaiman 4, Tabaloc 3, Parker 2, Villamor 2, Capilllar 1.

Ikaduhang duwa:
 UV (78) – Veloso 17, Escosio 14, Abad 11, Mpoma 10, Ferraren 8, Segumpan 7, Perolino 5, Aguirre 4, Octobre 2
 USJ-R (60) – Regalado 12, Suano 12, Mutya 8, Bayhonan 6, Senining 5, Catipay 5, Labares 4, Galvez 3, Lajato 3, Oulla 2. (BANAT NEWS)