Southwestern, FEU umiskor

MANILA, Philippines - Nakitaan ng tikas ang Southwestern University, habang mas solido ang la­rong natunghayan sa FEU upang manalo sa kanilang mga laro sa Shakey’s V-League Season 11 First Con­ference kahapon sa The Arena sa San Juan Ci­ty.

Sinandalan ng Lady Cobras ang block laban kay Krissian Tsuchiya at pa­matay na kill na galing kay guest player Lutgarda Malaluan para maisantabi ang 12-14 iskor sa deciding set at gapiin ang baguhang St. Louis University sa 25-20, 23-25, 25-15, 21-25, 19-17 iskor.

Namuro ang Lady Na­vigators sa sana ay unang panalo sa ligang inorganisa ng Sports Vision at may ayuda ng Shakey’s pero hindi nila nakuha ang deci­ding point upang ibigay sa CESAFI champion ang karapatan na saluhan ang Ate­neo sa unang puwesto sa Group A.

May 19 puntos si Mar­lyn Llagoso pero malaking tulong ang impresibong nu­mero galing kay setter na si Ne­resa Villanueva at liberong si Jerra Mae Pa­cinio.

Ang mga inaasahan naman ng FEU na sina Bernardette Pons at Remy Joy Pal­ma ay nagposte ng 21 at 15 pun­tos, ayon sa pagkakasunod, at nag­­sanib sa 30 kills para tu­­lungan ang La­dy Ta­ma­­raws sa 25-21, 20-25, 25-11, 25-20 panalo kontra sa San Sebastian sa ikalawang laro. (ATan)