Batucan milampos pagdepensa sa iyang titulo

CEBU, Philippines - Napanalipdan ni Efren Batucan ang iyang titulo sa advanced category sa Cebu Wake Jam Competition sa miaging adlaw didto sa Cebu Wake Park sa Papakits sa lungsod sa Liloan.

 Giladlad ni Batucan ang tanan niyang tricks sa wakeboarding  aron dili mailog ang korona sa karibal niyang si kanhi top junior motocross rider Ian Reyes.

 Hinuon, si Reyes adunay napupo sa iyang unang pagsalmot sa maong kompetisyon dihang ang organizers mibutang kaniya ngadto sa advanced class ug dili sa beginner's division kay aduna na kini daghang mga tricks.

 Pakyas si Reyes paglangkat sa titulo, apan alang kaniya, ang ikaduhang dapit usa ka halandumon nga   debut.

 Si Arnel Duterte, kinsa nag-una pa ni Reyes sa wakeboarding nalandig sa ikatulo.

 Sa laing bahin, si Ryna Pamili maoy nag-una sa beginners category, gisundan nilang Gerwen Pasay ug Jaross Veloso alang sa ikaduha ug ikatulong dapit.

 Sa wakeskating action, si JR Tuason maoy milangkat sa titulo human niya gipilde si Andre Dauz ug Kim Diola nga miokupar sa mosunod nga duha ka dapit. (BANAT PALARO)