32nd SAC-SMB awards sa Marso 26

Mohimo na sab og kasikas ang mga sakop sa Sportswriters Association of Cebu (SAC) nga gipangulohan sa atong "indefatigable" ug energetic kaayong presidente nga si Rico Navarro... dili lang writer ug columnist apan ring announcer ug athletic director sa Sacred Heart School- Ateneo de Cebu.

Sa laktud nga pagkasulti kung kapoyon ka na'g litanya sa iyang mga gihuptan nga posisyon, ato na lang siyang tawgon og Jack of All Trades. Kung dunay kape nga 8-in-1, naay Rico nga all-in-one kay kung maghisgot kita'g sports naa sab siya anang tanan.

Pasidunggan sa SAC ang mga Sugboanon o Cebu-based nga mga atleta ug hataga'g citation kadtong nga minor awardees ug plaque kadtong mga major awardees kinsa nakahatag og dungog sa atong nasud ilabi na sa international competitions. Adunay pilion nga ORLACSAN awardee, Presidential Awardee, Sportsman of the Year ug Athlete of the Year.

Ang guest speaker mao ang PBA commentator ug Philippine Star sports columnist Quinito Henson.

Ang SAC awards nga gipaluyohan gikan sa pagsugod sa maong grupo, gipaluyohan sa San Miguel Corporation, himoon karong Miyerkules, Marso 26 ug kung matingala kamo nganong natumong kini'g weekday sama niining dako kaayong kalihokan tungod kay wala gyu'd laing skedyul nga makuha. Gusto unta ni Rico nga himoon kining maong kalihokan sa adlaw'ng Sabado o Domingo apan wala'y bakanteng benyu.

Gikan sa pagsugod, San Miguel Corp. na gyud ang nagpaluyo sa SAC gikan pa sa panahon sa atong mga higala nga silang Xavier C. Ledesma, Tim Manalo, Jeruel Roa ug karon si Mam Girlie Garces. Wala'y paglubad ang suporta sa San Miguel kay kining maong korporasyon nakasabot sa kawsa ug nakasabot sa mga tumong, katuyoan ug mga panglantaw sa mga sports writers dili lang dinhi sa Sugbo apan sa tibuok nasud.

Ug kung nakadayeg kita kang Rico, wala'y katraungan nga dili kita modayeg kang Mam Girlie ug ingon man sab ang ubang mga kanhi PR managers sa San Miguel-Vismin CCO kon Corporate Communications Office.

BASKETBALL CLINICS. Dili na kalikayan nagkaduol na gyud ang summer. Summer vacation man alang sa uban apan sa kadaghanan trabaho lang gihapon.Matag bakasyon, adunay mga kalihokan nga kalingawan sa mga kabataan ug usa na niini ang pag-apil sa mga sports activities. 

Makaayo sa mga bata ang pagsalmot og mga sports activities kay gawas nga malingaw sila, mahimo sab nga himsug ang ilang lawas.

Ang akong higala nga si Chino Uy, kanhi point guard sa University of San Carlos Warriors mipahibalo kanako nga adunay ipahigayon nga serye sa basketball clinics ang CEBU, acronym alang sa Character Excellence Basketball Unlimited nga sugdan unya sa Abril 7 ngadto sa Abril 30 diha sa Cebu Coliseum ug lain pang mga clinic ang himoon didto sa J Center Mall ug sa Dumaguete City.

Matod pa ni Uy, ang founder sa CEBU Elite, ang mga clinics maghatag sa mga batan-on og kahigayonan nga makapakita sa ilang abilidad sa basketball.

Ang maong clinics alang sa mga batang babaye ug lalaki nga nagpangedaron og 7-21 anyos ug bisan pa gani mga varsity players tugotan nga mosalmot ilabi na kadtong gusto mokat-on og dugang basic fundamentals.   

Adunay bayad nga P1,850 ang clinic diha sa Cebu Coliseum ug libre ang upper jersey ug bola nga maoy gamiton alang sa training.

Ang first batch sa Abril 7-30 (Lunes ngadto sa Biyernes), sundan dayon sa second batch unya sa Mayo 5-30 gikan sab sa Lunes hangtod Biyernes.

Ang Beginners level himoon sa alas 8-10 sa buntag ug and the Advance class pagahimoon sa alas 10 ngadto sa alas 12 sa udto.

Ang gustong mopa-enroll diha sa Cebu Coliseum mahimong mokontak sa landline numbers nga 255-8919, 255-1405 og sa mobile phone numbers 0922-887-7705 ug 0922-887-2092.

Ang clinic didto sa JCenter Mall matag alas 4-6 sa hapon sa mao gihapong petsa, adunay bayad P2,000 tungod kay mas dako og abang matag oras sa gym.   

Ang mga coaches/trainors sa maong clinics naglakip kanilang ex-Warrior point guard Vernini Tangarorang, Galimar Largo, Jayzar Esperat, Jed Cabellon, Ope Abellana, Bon Rosito,Sesum Asignar ug Roland Remedio.

Ang clinic didto sa Dumaguete sa  Abril  7 ngadto sa 16 sa Lamberto Macias Memorial Gym pagadumalaon ni USC Baby Warriors coach Britt Carlo Reroma isip trainor ug aduna kini registration fee nga P1,850.

MISCELLANEOUS. Belated birthday greetings to my friend Danica Canitoy, CESAFI statistician who turned a year older last March 19.