Mandaue Mayor's Cup ugma

CEBU, Philippines - Mobisita dinhi sa Sugbo ang UAAP-member school National University (NU) Bulldogs ni coach Eric Altamirano aron mosalmot sa lima ka adlaw nga Mandaue City Mayor's Cup gikan sa Marso 25-29 didto sa Mandaue City Sports and Cultural Complex.

Dunay unom ka team nga mosalmot diin usa na niini ang Bulldogs ug lima ka lokal teams ug gibahin kini sa duha ka brackets.

Ang visiting team nga Bulldogs didto mahisakop sa Group B uban sa Southwestern University (SWU) Cobras ug sa Raphael's Cafe ni team manager Christian Senining.

Ang manghud ni Senining nga si Rendell, moduwa na sa UAAP sa umaabot nga season diin usa siya sa point guards sa Bulldogs.

Ang mga teams sa Group A mao ang 2013 CESAFI champion University of the Visayas (UV) Green Lancers, University of Cebu (UC) Webmasters ug University of San Jose -Recoletos (USJ-R)Jaguars. Ang team manager sa Jaguars mao si Raffy Senining, amahan sa mga players nga silang Christian, Renzo ug Rendell.

Unang magsangka ugma sa opening day mao ang Cobras batok sa Raphael's cafe sa alas siete sa gabii ug mosunod dayon ang sangka tali sa Lancers batok Jaguars.

Sa Miyerkules pa muabot ang Bulldogs ug wala pa nganli kung kinsay ilang kontra.

Ang kampyon sa maong torneyo makadawat og cash prize nga 30 mil pesos, ang second placer 20 mil pesos, ang third placer 15 mil pesos, ang fourth placer 10 mil pesos ug ang fifth placer singko mil pesos. Bugtong ang sixth placer o kinaiwitan nga team maoy dili makadawat og premyo. (BANAT SPORTS)