San Beda 2-0 na

CEBU, Philippines - Sa ilang 2-0 nga baraha, daw dili na kalikayan nga koronahan na ang bisitang team gikan sa NCAA ang four-peat champion San Beda Red Lions isip kampiyon sa Cebu City Mayor's Cup Inter-Collegiate basketball tournament diha sa Cebu Coliseum.

Human sila modaug batok sa University of San Jose-Recoletos (USJ-R) Jaguars, 78-63 sa opening day niadtong Biyernes sa gabii, midaug sab ang San Beda kaniadtong Sabado sa gabii batok sa University of San Carlos (USC) Warriors, 78-61 alang sa ilang 2-0 nga baraha. Niining maong short tournament, ang team nga maoy labing daghan og daog maoy ilhong kampiyon.

Bugtong makabaraw sa tinguha sa Red Lions nga sakmiton ang titulo mao ang kadaugan sa University of the Visayas (UV) Green Lancers kinsang kampanya kalit lang nabuhi dihang midaug sila batok sa Jaguars sa overtime, 83-79 sa miaging gabii. Hinoon ning pagsuwat sa alas kuatro sa hapon, gikatakda pang mag-abot ang San Beda ug UV sa main game ug wala pa hisayri ang final results.

Sa higayon modaug ang Lancers, sila maoy mahimong kampiyon tungod kay kung dunay mahitabong simple tie sa 2-1 nga baraha, ang Lancers maoy ilhong champion.

Apan bisan pa og modaug ang Lancers ug modaug sab ang Warriors batok sa Jaguars ug mahitabo ang triple tie sa 2-1 nga baraha, ang San Beda gyud maoy ilhong kampyon tungod kay sila maoy maka-angkon sa labing taas nga quotient.    (BANAT SPORTS)