Gipatagam sa CFA

CEBU, Philippines - Mipakanaog na sa ilang hukom ang Cebu Football Association (CFA)  ngadto sa hintungdan nga nalambigit sa 'karambola' tali sa Sacred Heart School-Ateneo de Cebu (SHS-AdC) ug Alcoy FC sa duwa sa under-18 division sa 16th Aboitiz Cup niadtong Domingo didto sa Aboitiz Sports Field sa Brgy. Subangdaku, Mandaue City.

 Tungod sa kontrobersiya nga mitay-og sa Cebu football community, ang CFA Board of Directors mihimo og dinaliang   imbestigasyon nga miresulta sa ilang hukom pag-disqualify sa duha ka koponan sa Aboitiz Cup.

 "After a thorough evaluation of the circumstances surrounding the incident, it is the unanimous opinion of the members of the Board of Directors of Cebu Football Association that the team officials of both Ateneo de Cebu and Alcoy FC lost control and miserably failed to prevent the players on the bench from entering the playing field of their respective players," matud pa sa CFA Board.

 Gikuhaa'g sukaranan sa CFA Board sa ilang desisyon mao ang mga taho sa referee nga maoy mi-officiate sa duwa niadtong tungora.

 Gitumbok usab sa CFA ang mga players sa duha ka kampo nga maoy nagpasiugda sa maong kagubot sa wala pa misawsaw ang mga walay labot sa koponan.

 Tungod sa pagkapakyas nila sa pagpaundang sa kagubot tali sa ilang mga players, ang CFA mosuspenso usab og unom ka buwan sa duha ka coaches nga silang Hayato Ayabe sa Ateneo ug Chris de los Santos sa Alcoy.

 "It is expected from coaches to develop not only the skills of the players but also to develop the attitude and values of the players to make them better persons of the society," dugang pa sa CFA.

 Ang unom ka players nga direktang nalambigit sa sumbagay gisuspenso usab og unom ka buwan. Kasagaran usa ka tuig ang suspenso niini, apan gipaubsan kini tungod kay mga menor de edad ang maong mga players.

 Si CFA President Ricky Dakay miingon nga ang ilang hukom ug resulta sa imbestigasyon ipadala ngadto sa Philippine Football Federation  (PFF) nga gipaabot sab mopahamtang og lahi nila nga silot ngadto sa mga nalambigit sa kagubot. (BANAT NEWS)