Nuggets miputol daog sa Clippers

CEBU, Philippines -   Gipakgang sa Denver Nuggets ang 11-game winning streak sa Los  Angeles Clippers  pinaagi sa pag-iskor og daog, 110-100 sa ilang duwa sa NBA kagahapon didto sa Pepsi  Center sa Denver, Colorado.

 Miposa'g 21 puntos si J.J. Hickson, samtang si Ty Lawson miantog og 19 puntos diin otso niini iyang nahimo sa uwahing rally sa Nuggets. Si Kenneth Faried miamot og 18 puntos uban sa iyang 16 ka rebounds.

  Si Blake Griffin  mibahog og 26 puntos alang sa Clippers nga mao karon ang mipahiluna sa ikatulo sa Western Conference sa ilang 48-20 nga baraha.

 Ang 11 ka sagunson nga daog sa Clippers maoy ikaduha nilang  labing taas sa ilang franchise.  Una human sila  mihimo og 17 ka sunod-sunod nga daog ug didto gihapon kini naputol sa ilang balwarte.

 Ang Nuggets layo pa sa posisyonay alang sa playoffs diin sila maoy ika-11 overall sa West sa ilang 29-37.

 Biya unta ang Nuggets sa nahabiling 4:21 sa duwa, apan ang three-pointer ni Lawson maoy nakapalabaw pag-usab nga kabahin sa ilang 14-2 run sa pagtak-op sa duwa.

 Si Chris Paul maoy nangu sa Clippers sa iyang 29 puntos ug may pito ka assists aron makatigum og 5,996 sa iyang career. Maoy tuyo ni Paul nga malakip sa grupo nilang Magic Johnson, John Stockton ug Isiah Thomas isip mga NBA players nga miabot og 6,000-assist plateau.

 Sa laing mga duwa, midaog ang Indiana Pacers batok sa Philadelphia 76ers, 99-90,  ang Oklahoma City Thunder miihaw sa Chicago Bulls,  97-85. Gibihag sa Atlanta Hawks ang Charlotte Bobcats, 97-83, ang Brooklyn Nets mikubit og daog batok sa Phoenix Suns, 108-95, ang Houston Rockets milubong sa Utah Jazz, 124-86 ug  ang Dallas Mavs midaog  sa Boston Celtics, 94-89. (BANAT NEWS)