Nabugto

CEBU, Philippines -  Nabugto didto sa ilang balwarte ang  nagkadinang tulo ka  pilde sa Miami Heat pinaagi sa pagpakaging sa Washington Wizards, 99-90  sa  ilang  duwa  sa  National  Basketball Association kagahapon didto sa American Airlines Arena sa Miami, Florida. 

 Sayo kaayong nanginit si LeBron James ug gisawo kini ni Dwyane Wade sa fourth period aron magkumboya og 45 puntos. Si James mipabuhagay og 23 puntos, samtang si Wade mipahungaw og 22 puntos diin 13 puntos niini iyang nahimo sa final period.

 Si James mao sab ang responsabli sa 12-0 nga rally sa Heat sa final period.

 Ang sentro nga si Chris Bosh miabuno sab og 22 puntos alang sa 44-17 nga Heat, kinsa   biya na lang og usa ka duwa tali sa Indiana  Pacers sa ilang bangga alang sa No. 1 spot sa Eastern Conference ug may 1 1/2 games sa San Antonio Spurs (46-16) alang sa best record.

 Si Ray Allen miamot og 13 puntos alang sa Miami nga napilde sa ilang road trip didto sa Houston, San Antonio ug sa Chicago.

 Dili kaayo daghan og naduwaang "back-to-back" games karon nga season si Wade, apan niadtong higayona, siya maoy nagbaswat sa Heat sa nahabiling mga minutos sa duwa  aron malikayan ang  ikaupat nilang sunod-sunod  nga pilde sukad niadtong 2011.

 Si Bradley Beal mihimo’g 18  puntos alang sa Washington, samtang sila si Martell Webster ug Drew Gooden mitampo'g 17 ug 15 puntos matag usa.

 Miiskor sab og double digits si Marcin Gortat pinaagi sa iyang 14 puntos. Mihimo sab siya og career-high-tying nga 18  diin ang 10 niini didto himoa sa first period.

 Ang Washington unta maoy naglabaw sa tunga-tungang bahin sa fourth period, 84-83, apan kalit lang nanginit si Wade aron mailog sa  Miami ang momentum.

 Sa lain pang mga duwa, gibihag sa Charlotte Bobcats ang   Denver   Nuggets, 105-98,  ang Brooklyn  Nets  mipukan  sa Toronto Raptors, 101-97.

 Ang  New York Knicks milubong sa  Philadelphia Sixers, 123-110,  ang Atlanta Hawks midagit  og  daog  pinaagi sa pagbihag sa Utah Jazz, 112-110.

 Midaog na sab ang Los Angeles Clippers sa ilang sangka batok sa Phoenix Suns, 112-105 ug ang  Milwaukee Bucks misungag sa  Orlando Magic sa iskor nga 105-98. (BANAT NEWS)