Eddiegul midayeg kang Slaughter, iyang desisyon "shows character"

Tungod sa atong "passion" o pagkamahigugmaon (naungo) sa basketball, halos tanang lihok sa atong mga basketball stars atong bantayan ug usahay nagtuo kita nga kita maoy husto unya ang mga players maoy sayop.

Kining tanan bunga lang gyud sa atong pagkamahigugmaon sa basketball ilabi na kay gusto sab kita nga kung mahimo, dili mapilde ang Pilipinas.

Nakahimo'g kasikas karon ilabi na gyud dinhi sa Sugbo ang desisyon ni kanhi UV center ug Ateneo center nga si Gregg Slaughter human siya mobalidad sa imbetasyon nga dili moduwa sa RP Team-Gilas Pilipinas alang sa 2014 World Cup didto sa Spain karong Agosto.

Nakasabot si Gilas coach Chot Reyes sa pamahayag ni Slaughter apan ang uban natong kaigsoonan maoy wala makasabot. Matod pa ni Slaughter nga gusto niya nga ang orihinal nga 12-man member sa Gilas nga midaug batok sa South Korea kaniadtong Agosto sa miaging tuig mao nala'y ipadala.  Nakasabot si coach Chot niini ug gani gidayeg niya ang hukom ni Slaughter tungod kay humana sab siya makaduwa sa RP Team.

Tinuod daku kaayong dungog nga makaduwa ka'g National Team nga magdala sa atong bandila apan sa gihimo ni Slaughter, dalaygon siya. Wala siya maghinakog ug maoy iyang gusto nga hatagan og kahigayonan ang laing players. Tingali sa pwesto ni Slaughter kinsa usa ka Fil-Am, usa ka Pinoy ang mopuli sa iyang luna.

Ambot unsa ka dako kanang isyuha nga gani kaniadto, akong nahinumdoman nga si Ramon "El Presidente" Fernandez mibalibad man sa pagduwa sa Philippine Team tungod kay maoy iyang gusto nga mahatagan og tsansa ang uban nga nagdamgo sab nga makaduwa sa national team.

Ug nidtong tungora, ang desisyon ni Mon gidayeg sa kadaghanan. Unya karon nganong dili man nato dawaton ang desisyon ni Slaughter?

Usa sa mga lig-ong haligi a sports dinhi sa Sugbo ilabi na sa natad sa basketball nga si kanhi kongresista Eduardo R. Gullas ang nakasabot sa gihimo ni Slaughter.  Atong makita nga si Eddiegul makamao gyud mitimbang-timbang kung unsay sayop o unsay husto. Mas gipatigbabaw ni Eddiegul ang prinsipyo nga gihuptan ni Slaughter dili kay ang dungog sa iyang pagka-player mao ray kanunay giapas.

Sa usa ka text message ni Eddiegul nga gi-forward dinhi sa SPORTSgab ni Marichu Cabanilla sa UV-Gullas' office, siya nagkanayon "Your decision to let the original 12 players represent the RP in Spain shows CHARACTER! I and your UV hail and congratulate you.We are so proud of you! All the best."   

MAYOR RAMA's MARKSMANSHIP. Misaksi ako sa championship game tali sa Mayor's Office batok sa Cebu City Medical Center (CCMC) team kaniadtong Biyernes diha sa San Nicolas gym tungod kay gusto akong motan-aw kung unsa gyud ka hingigo kini si Mayor Mike gikan sa three-point area.

Tinuod nga dili kaayo hugot ang depensa apan sayop sab kung mo-ingon kita nga wala siya depensa-e. Dunay depensa ug mo-isa sa kamot ang nagdepensa apan dili lang kaayo hugot kay bisan kinsa naman tingali nga normal og utok nga tawo nga misalmot sa Cebu City Hall Inter-Department nga torneyo, dili gyud tingali moduwa og pisikal ngadto sa Mayor gawas ug nawad-an na gyud siya'g paglaum o kung dili na siya gustong motrabaho ubos sa administrasyon ni Rama.

Medyo mulayo sab gamay ang nagdepensa kang Mayor Mike tungod kay adunay screen nga himoon aron siya malibre ug sa akong pagpaniid, duna gyud siya'y tarung nga pulso. Bisan og kinsa nga player nga biyaan pagpa-itsa kung banga gyud, aw dili gyud maka-igo may depensa o wala ug tingali kapuyon na lang siya'g itsa o mauwaw ba hinoon kung dili gyud maka-igo.                 

 Nasibot ako sa pagtan-aw tungod kay sa miaging semana, akong nasayran nga dihay usa ka duwa nga mibahug og 28 ka three-pointers si Mayor Mike ug sa laing duwa mibahug siya'g 23 ka triples.Sa finals, mihimo siya'g 17 ka triples.

 Nakahimo na siya'g 84 puntos ug ang akong gihuwat kung kanus-a siya makahimo'g 100 puntos aron ang titulo sa article mao kini "Mayor Rama did a Chamberlain." Anyway, Congrats Mayor Mike.