Heat, Thunder nangapilde
CEBU, Philippines - Parehong nangamote ang defending champion Miami Heat ug ang Oklahoma City Thunder sa tagsa-tagsa nila ka duwa kagahapon sa National Basketball Association sa managlahing binyu.
Didto sa AT&T Center sa San Antonio, Texas, gilubong sa Spurs ang Heat, 111-87 ubos sa pagtimon ni Tim Duncan, kinsa mibahog og 23 puntos milangkat og 11 ka rebounds.
Didto sa US Airways Center sa Phoenix, Arizona, si Gerald Green mikulit og career-high 41 puntos, diin 25 niini gikan sa third quarter aron pangulohan ang Suns ngadto sa 128-122 nga kadaugan batok sa Thunder.
Ang iyang puntos sa usa ka quarter diriyot motabla sa Suns’ franchise record nga 26 nga nahimo ni Stephon Marbury niadtong 2002, samtang ang iyang walo ka three-pointers hapit motabla sa Suns’ franchise record nga siyam ka triples.
Ang maong kadaugan maoy labing daku nga biya sa Heat karon nga season.
Ang ilang "rematch" human sa NBA Finals sa miaging tuig gisugat og makabungog nga hugyaw sa mga fans nga nakahatag emosyon ngadto sa mga players sa matag habig.
Si Tony Parker midugang og 17 puntos, 14 niini sa first half, si Boris Diaw mitampo'g 16 puntos samtang si Kawhi Leonard miamot og 11 puntos alang sa Spurs nga adunay 45-16 nga baraha.
Si Chris Bosh maoy nangu sa namugnaw nga Heat pinaagi sa iyang 24 puntos, gisundan ni LeBron James nga adunay 19 puntos. Si Dwyane Wade mitampo'g 16 puntos ug si Michael Beasley miduslit og 11 puntos alang sa Miami nga nagbitbit og 43-16 win-loss record.
Napugngan si James sa depensa ni Leonard ug matud pa niya nga ang ilang huot nga short-sleeved jerseys nga may markang "El Heat" dili kaayo makatabang alang sa pag-iskor.
Nakasikit unta ang Miami ngadto sa 74-79 sa nahabiling dos minutos sa third period, apan mao kadto ang labing maayo nilang nahimo.
Ang Thunder gipangulohan ni Russell Westbrook sa iyang 36 puntos ug si Kevin Durant miposte'g 34 puntos.
Sa laing duwa kagahapon, gilatos og maayo ang Los Angeles Clippers ang ilang silingang koponan nga L.A. Lakers, 142-94. (BANAT NEWS)
- Latest
