Batan-ong Luigi Bercede umaabot player sa pba

Tingali, dili tanan ang nasayud nga kini diay si Luigi Bercede, anak ni Mandaue City Vice-Mayor Glenn Bercede, gioperahan sa iyang "spleen" nga usa ka matang sa internal organ nga may gidak-on nga daw kumo sa tawo ug nahimutang duol sa atong baga ug atay. 

Dili tiaw ang kabalaka nga gibati ni Vice-Mayor Glenn dihang nakadawat siya'g tawag gikan sa team manager sa Hog's Breath Cafe Razorbacks, ang team ni Luigi sa PBA-D League nga nagpahibalo kaniya nga nakuyapan si Luigi ug gikatakdang ipailawom sa operasyon sa spleen sumala sa nakita sa x-ray kay nibuto na kini.

Gipahigayon ang maong operasyon didto sa Medical City sa Metro Manila niadtong Septiyembre 9, 2013.

Nahitabo ang disgrasya samtang padung nang mo-lay-up si Luigi ug may misugat kaniya nga nagdepensa ug ang player nga didto sa iyang likod maoy nakadasmag kaniya. Tungod sa kakusog sa bangga, mibuto ang iyang spleen.

Human sa operasyon, pipila una ka adlaw nga nagpa-alim sa samad si Luigi ug ang nakawagtang sa kabalaka ni Vice mao ang paghatag og moral support ni PBA rookie ug Best Player of the Conference (Philippine Cup) nga si June Mar "The Kraken" Fajardo, ang kanhi teammate ni Luigi sa University of Cebu (UC) Webmasters nga naka-back-to-back title sa Cebu Schools Athletic Foundation, Inc. kon CESAFI.

Hingpit nga nagpaayo sa iyang operasyon si Luigi diha sa ilang panimalay sa barangay Banilad sa Mandaue.

Unang nahatagan og break si Luigi nga makaduwa sa PBA D-League dihang nahimo siyang player sa Cafe France Bakers ug niadtong mga panahona, daan nang nakit-an nga medyo naghubag ang iyang spleen.

Ang Sugboanong coach nga si Jun Tan maoy mirekomendar ngadto kang Luigi nga makaduwa sa Cafe France ubos sab sa tabang ni player-agent Danny Espiritu, usa ka ilado ug respetadong agent-manager nga nakamugna na'g daghang PBA players. Gani sa iyang club-beer house sa Manila, halos tanang dekorasyon sa bungbong mga "framed" photos sa iyang mga PBA players. 

Dunay usa ka buwan nga wala makaduwa si Luigi ug maayo na lang gani kay gikuha siya sa Hog's Breath sa D-League nga mao sa'y nahimong yawe sa iyang pagka-diskubre sa Global Port Batang Pier.

Nakaduwa sa Global Port si Luigi niadtong Pebrero 22 didto sa Mandaue City Sports and Cultural Complex atubangan mismo sa iyang mga kababayan sa Mandaue. Dili pa gyud kadto natawag natong PBA debut kay dili pa man gyud siya official player sa PBA tungod kay mag-agi pa  siya sa drafting.

Usa si Luigi sa mga maayong "defensive" guards dinhi sa Sugbo ug ang iyang pagka-agresibo.

Sa wala pa mahimong sakop sa UC Webmasters si Luigi, migradwar una siya sa B.S. Accountancy diha sa University of San Carlos diin sakop sab siya sa Warriors varsity team.

Tungod kay wala kaayo siya hatagi og igong playing time, mibalhin siya sa UC ug dihang migradwar si Kelvin Juliane, nahatagan na siya'g dakung break tungod kay siya maoy back-up guard ni Brian Quinton Heruela.

Niadtong Pebrero 22, maoy bisita ni Vice ang entiro Global Port team pinangulohan ni coach Pido Jarencio ug didto pwerteng banat nila sa duha ka lechon nga maoy paborito bisan kinsang bisita nga taga Manila.

 Kami lang ni Enrico Villanueva ug ni Eric Menk sa usa ka lamesa ug ganado kaayo silang nagkaon sa lechon. Samtang nalingaw ako nga nagtan-aw kang Menk nga nagsige'g hungit sa lechon, ako siyang gi-ingnan kung unsay deperensya sa lami sa Cebu lechon ug sa La Loma lechon ug mitubag siya "this one here tastes better" ug misagbat sab si Villanueva sa pag-ingon "iba talaga didto. Mas masarap ang templa at iba ang ginamit na spices."

Ug tungod lagi kay bisita man siya sa ikaduhang dakung opisyal sa adunahan dakbayan sama sa Mandaue, ang tanang players sa Global Port wala gyud magmahay kay nakabitbit sila'g pasalubong sama sa dried mangoes, masareal ug ang ilang pambato nga "bibingka sa Mandaue."