Mayor Rama miantog og 73 puntos

CEBU, Philippines - Sama kainit sa naglagiting nga summer, init sab kaayo ang kamot ni Cebu City Mayor Michael Rama kinsa nagmangtas na sab sa miaging weekend aron pangulohan ang Mayor's Office ngadto sa 131-77 nga demolisyon batok sa Sangguniang Panlungsod (City Council) aron moabante ngadto sa finals sa naghinapos na nga Cebu City Hall Inter-Department basketball tournament nga gipahigayon kaniadtong Pebrero 28 didto sa San Nicolas gym, ning dakbayan.

Mibahog og 73 puntos ang dribbling city executive nga si Mayor Rama kinsa mipataruy sab og 21 ka three-point shots aron hubgon ang ilang kontra nga misarasay nang daan didto sa third period dihang na-outscore sila ni Mayor Rama ug kaubanan, 42-19 human lang sa 12 puntos nga labaw sa halftime, 53-41.

Ang SP duna pay tsansa nga makaduwa alang sa ikatulong pwesto bisan pa sa ilang 54 puntos nga kapildehan apan mag-agi una sila sa mga kamot sa Cebu City Medical Center (CCMC) nga gipangulohan sa top gunner nga si Danny Aying.

Labing posibleng mahitabo sa maong torneyo mao ang finals tali sa Mayor's Office batok sa CCMC sa sunod semana.

Si Aying kinsa player sab sa Mayor's Office sa laing torneyo, maoy nangu sa CCMC dihang ilang gipukan ang Department of Public Service kon DPS.

Silang Argiel Magan ug Emilio Aniñon kinsa parehong mga college varsities sa ilang panahon, mibahug og 14 ug 12 puntos alang sa Mayor's Office samtang ang ex-Lancer nga si Rene Toring midugang og 10 puntos.          

Ang napildeng SP gipangulohan ni Allen Aninipoc kinsa miposa og 18 puntos ug laing tulo ka teammates ang mibahug sab og double figures.  (BANAT PALARO)