Servania mi-iskor og tko vs. Munoz
Parañaque City , Philippines — Miagi pa og lisud si Genesis ‘Azucal’ Servania (24-0, 10KOs) sa wala pa niya makuha ang 12 round TKO batok ni former two-time world champion Alexander ‘El Explosivo’ Munoz (36-6, 28KOs) sa main event sa ‘Pinoy Pride XXIV:The Future is Now’ fight card niadtong miaging gabii didto sa Solaire Resort and Casino.
Gawas nga lig-on ang iyang kontra, si Servania nakasugat usab og kakulian sa dihang nakahiagum siya og lawom nga gisi sa kilay ug gibikugan usab siya sa tunga-tungang bahin sa away.
“Nawala gyud ako concentration tungod sa akong cut ug nag-cramps sad ako nga tiil,†matud pa sa 22-anyos nga si Servania.
Tungod sa abiba sa iyang pamilya ug mga fans nabalikan sa iyang kusug si Servania kinsa mibomba na usab sa iyang mga kinumo nga miresulta sa laing knockdown sa ninth round dihang naigo og bodyshot si Munoz.
Subling mibarug si Munoz ug nakalahutay pa hangtud sa final round, apan ning tungura wala na siya tagai pa og kahigayunan ni Servania kinsa mipatugpa og bangis nga left straight nga hingpit nga mipawong sa panan-aw sa Venezuelan sa 2:22 sa final round.
“Nalipay ko sa ako nga daog tungod kay bisa'g lisud, napilde nako ang usa ka former champion,†matud pa ni Servania kinsa gisaaran og laing dagkung away sa ALA Promotions.
Si ALA Promotions CEO Michael Aldeguer miingon nga nakignegosasyon sila karon sa kampo sa duha ka former world champions nga sila si Fernando Montiel ug Vic Darchinyan alang sa posibleng sangka batok ni Servania.
Sa supporting bouts, si ‘Prince’ Albert Pagara (18-0, 12KOs) yanong mikulata ni Isack Junior (22-4, 8KOs) sa first round, apan nag-agi og lisud si ‘King’ Arthur Villanueva (25-0, 14KOs) kinsa nanginahanglan pa og unanimous decision aron pildehon ang last minute replacement nga si Fernando Aguilar (9-7, 1KO). (BANAT PALARO)
- Latest
