Jaca pilde, gi-TKO
PASAY CITY, Philippines - Nakatilaw og sakit nga kapilden si WBO Oriental light welterweight champion Jimrex 'Executioner' Jaca sa ALA Boxing Gym dihang gipaundang siya ni Japanese contender Shinya Iwabuchi sa ilang eight-round non-title bout sa miaging adlaw didto sa Korakuen Hall sa Tokyo, Japan.
Makuha unta ni Jaca ang sayong kadaugan dihang iyang napatumba sa second round si Iwabuchi, apan mibakod ang Japanese fighter aron mopadayon sa away.
Si Jaca, naglabaw sa scorecards sa mga hurado, apan ang daku unta niyang kahigayonan pagdaog nahanaw dihang naigo siya sa bangis nga kombinasyon gikan ni Iwabuchi.
Nibarag si Jaca ug didto na gilumsan sa mga kumo ni Iwabuchi ang Pinoy'ng boksidor, kinsa nagkapuliki na'g panagang nga maoy nakapaaghat sa referee pag-undang sa away sa 45 seconds sa seventh round.
Ang maong pilde maoy labing unang natilawan ni Jaca sukad niadtong tuig 2010. Naputol usab ang iyang 11 fight winning streak.
Si Jaca midailos sa rekord nga 39-7, 22KOs, samtang si Iwabuchi misaka ngadto sa 23-4, 19KOs.
"It was supposed to be his win but he got hit. He was on his way for bigger fights but with the result, Jimrex will now go back to the drawing board," matud pa ni ALA Promotions big boss Michael Aldeguer.
Masulod unta sa Top 10 sa ranking sa WBO welterweight division si Jaca kun nidaog pa kini. (BANAT NEWS)
- Latest
