Giluwas ni Dirk

CEBU, Philippines - Alang kang Dirk Nowitzki, ang iyang tirada maoy usa sa labing kinabatian nga nahimo.

 Misulbong una'g taas kaayo gikan sa board ang bola human moigo sa ring ug didto kini mahagbong sa lungag dayong huni sa buzzer nga maoy nakapadaog sa Dallas Mavericks.

 Ang Mavs midaog batok sa host New York Knicks, 110-108 sa ilang duwa kagahapon didto sa Madison Square Garden sa New York City.

 Tungod sa maong kadaugan, ang Dallas ni team owner Mark Cuban mikatkat ngadto sa ikapitong pwesto sa Western Conference  nga adunay 35-23 win-loss record.

 Maayo untang nakadepensa si Carmelo Anthony sa katapusang ball possesion sa Dallas, apan dihang misulod ang tirada ni Nowitzki, daw usa ka kandila nga giugbok si Anthony, kinsa maoy nangu sa Knicks pinaagi sa iyang 44 puntos ug siyam ka rebounds.

 Si Vince Carter mitusak og pito ka three-pointers alang sa iyang season-high 23 puntos, samtang si Monta Ellis midugang og 22 puntos alang sa Dallas nga midaog na og siyam sa ilang 11 ka duwa ug anaa karon sa ilang season-best nga kapin sa 12 ka duwa lapas sa .500.

 Ang Mavs midaog na og 20 sa miaging 25 nila ka duwa batok sa Knicks.

 Si Nowitzki igo lang miamot og 15 puntos

 Sa lain pang mga duwa, ang Milwaukee Bucks milubong sa  Philadelphia Sixers, 130-110,  ang Golden State Warriors  midaog batok sa Detroit Pistons, 104-98, midaog sab ang Los  Angeles Clippers batok sa New Orleans Pelicans, 123-110 ug  ang Utah Jazz milubong sa Boston Celtics sa iskor nga 110-98. (BANAT NEWS)